പത്തനംതിട്ട: കെ.പി.സി.സി പ്രസിഡൻ്റ് കെ. സുധാകരനും പ്രതിപക്ഷ നേതാവ് വി.ഡി സതീശനും തമ്മിലുള്ള ഭിന്നത വയനാട് ചിന്തൻ ശിബിരുമായി ബന്ധപ്പെട്ട് മറനീക്കി പുറത്തായതോടെ തദ്ദേശ തെരഞ്ഞെടുപ്പിനൊരുങ്ങുന്ന കോൺഗ്രസിൽ പ്രതിസന്ധി രൂക്ഷം. ഗ്രൂപ്പ് വികാരത്തിനപ്പുറം രണ്ട് മുതിർന്ന നേതാക്കൾ തമ്മിലുള്ള അഭിപ്രായ വ്യത്യാസങ്ങളാണ് അനുകൂല രാഷ്ട്രീയ കാലാവസ്ഥയെയും അനിശ്ചിതത്വത്തിലാക്കുന്നത്.

ഓൺലൈൻ യോഗത്തിലെ വിവരങ്ങൾ മാധ്യമങ്ങള്‍ക്ക് ചോര്‍ത്തി നല്‍കുകയും യോഗം വിമര്‍ശിച്ച നേതാക്കളുടെ പേര് പുറത്തുവിട്ടതും തിരുവനന്തപുരത്തെ ചില കേന്ദ്രങ്ങളാണെന്നും നേതാക്കൾ പറയുന്നു. ലോക്സഭാ തെരഞ്ഞെടുപ്പ് വിജയത്തെ തുടര്‍ന്ന് തദ്ദേശ, നിയമസഭാ തെരഞ്ഞെടുപ്പുകളിൽ മുന്നിലെത്താനുള്ള തന്ത്രങ്ങളിലാണ് കോണ്‍ഗ്രസ് ദേശീയ നേതൃത്വം. ഇതിനിടെ വയനാട് യോഗത്തിൽ സതീശനെതിരേ കെ.സി വേണുഗോപാലിൻ്റെ വിശ്വസ്തരായ കെ.പി.സി.സി ജനറല്‍ സെക്രട്ടറിമാര്‍ രംഗത്തുവന്നതാണ് സ്ഥിതിഗതികൾ രൂക്ഷമാക്കിയത്.

ഓൺലൈൻ യോഗവുമായി ബന്ധപ്പെട്ടുണ്ടായ സംഭവങ്ങളില്‍ സതീശന്‍ വിഭാഗവും കടുത്ത അതൃപ്തിയിലാണ്. അതുകൊണ്ടു തന്നെ മിഷന്‍ 2025 ഏറ്റെടുക്കണമോ വേണ്ടയോ എന്ന കാര്യത്തില്‍ ഹൈക്കമാന്‍ഡ് തീരുമാനം എടുക്കട്ടെ എന്ന നിലപാടിലാണ് അവര്‍. ഇതിനിടെയാണ് സതീശനുമായി ഒത്തുതീര്‍പ്പിനില്ലെന്ന നിലപാട് സുധാകരന്‍ എടുക്കുന്നത്.

ലോക്സഭാ തെരഞ്ഞെടുപ്പിൽ സുധാകരനെ നിർബന്ധിപ്പിച്ച് മത്സരിപ്പിക്കുകയും ശേഷം പദവിയിൽനിന്ന് ഒഴിവാക്കാനും നടത്തിയ നീക്കങ്ങളിൽ കടുത്ത പ്രതിഷേധം ഉണ്ടായിരുന്ന സുധാകരൻ എ.കെ. ആൻ്റണിയുടെ കൂടി പിന്തുണയിലാണ് പദവിയിൽ തിരികെയെത്തിയത്. സ്ഥാനത്തുനിന്ന് മാറ്റുന്നെങ്കിൽ അതിനും സുധാകരൻ തയാറാണ്. സുധാകരനൊപ്പം സതീശനും സ്ഥാനചലനം വന്നേക്കും. ഇത് മുന്നിൽക്കണ്ടാണ് രണ്ടും കൽപ്പിച്ച് സുധാകരൻ നീക്കം നടത്തുന്നത്. കെ.പി.സി.സി പ്രസിഡൻ്റ് സ്ഥാനത്തേക്ക് കണ്ണും നട്ടിരിക്കുന്ന വലിയൊരു വിഭാഗം നേതാക്കൾ പാർട്ടിയിലുള്ളതിനാൽ നേതൃമാറ്റം പോലും പ്രതിസന്ധി വർധിപ്പിക്കുമെന്നാണ് മുതിർന്ന നേതാക്കൾ പറയുന്നത്. 

Internal conflict between KPCC President Sudhakaran and Opposition Leader VD Satheesan disrupts Congress Mission 2025 plans.