ന്യൂഡല്‍ഹി: രാജ്യതലസ്ഥാനത്ത് കനത്ത മഴയില്‍ ഏഴ് മരണം. വെള്ളപ്പൊക്കത്തിനിടയില്‍ ഓടയില്‍ വീണ് അമ്മയും കുഞ്ഞും മരിച്ചു. മയൂര്‍ വിഹാര്‍ ഫേസ് ത്രീയിലെ ഖോഡ കോളനിയിലാണ് 22 വയസുള്ള സ്ത്രീയും രണ്ടര വയസുള്ള കുഞ്ഞും മരിച്ചത്. 

കനത്ത മഴയില്‍ ഡല്‍ഹി ഏതാണ്ട് നിശ്ചലമായ അവസ്ഥയിലാണ്. തലസ്ഥാനത്തെ പല ഭാഗങ്ങളിലും രൂക്ഷമായ വെള്ളക്കെട്ടാണ് രൂപപ്പെട്ടത്.റോഡുകളില്‍ വെള്ളക്കെട്ട് രൂപപ്പെട്ടതോടെ വലിയ ഗതാഗതക്കുരുക്കാണ് അനുഭവപ്പെടുന്നത്. 

ചിലയിടങ്ങളില്‍ റെക്കോര്‍ഡ് മഴയാണ് ലഭിച്ചത്. അതിതീവ്ര മഴയ്ക്ക് സാധ്യതയുള്ളതിനാല്‍ കാലാവസ്ഥാ വകുപ്പ് റെഡ് അലര്‍ട്ട് പ്രഖ്യാപിച്ചു. ഓഗസ്റ്റ് അഞ്ചു വരെ മഴ തുടരുമെന്നാണ് പ്രവചനം.  നഗരത്തിലെ എല്ലാ വിദ്യാഭ്യാസ സ്ഥാപനങ്ങള്‍ക്കും അവധി പ്രഖ്യാപിച്ചിരിക്കുകയാണ്. 

ഡല്‍ഹിയിലേക്കുള്ള 10 വിമാനങ്ങളാണ് ജയ്പൂരിലേക്കും ലഖ്‌നോവിലേക്കും തിരിച്ചുവിട്ടത്. മണിക്കൂറുകള്‍ വൈകിയാണ് സര്‍വീസ് നടത്തുന്നതെന്ന് വിവിധ എയര്‍ലൈനുകള്‍ അറിയിച്ചു.