നെഹ്റുട്രോഫി വള്ളംകളി മാറ്റിവച്ചു. വയനാട് ദുരന്തത്തിൻ്റെ പശ്ചാത്തലത്തിലാണ് തീരുമാനം. സെപ്തംബറിലാകും വള്ളംകളി നടക്കുക. പുതുക്കിയ തീയതി പിന്നീട് തീരുമാനിക്കും. വള്ളംകളി മാറ്റുന്ന കാര്യം മുഖ്യമന്ത്രി പിണറായി വിജയൻ അംഗീകരിച്ചു. ഔദ്യോഗിക പ്രഖ്യാപനം ഉടനുണ്ടാകും.

ഓഗസ്റ്റ് 10നാണ് വള്ളംകളി നടക്കാനിരുന്നത്. ക്ലബ്ബുകളും സംഘാടകരുമായി ആലോചിച്ച് മറ്റൊരു ദിവസം നടത്താനാണ് തീരുമാനിച്ചിരിക്കുന്നത്. 2018 ലും -2019 ലും വെള്ളപ്പൊക്കത്തെ തുടർന്നു വള്ളം കളി മാറ്റി വച്ചിരുന്നു. കൊവിഡ് കാലത്ത് വള്ളംകളി നടത്തിയിരുന്നില്ല.

നേരത്തെ നിശ്ചയിച്ച സാംസ്‌കാരിക ഘോഷയാത്രയും കലാസന്ധ്യയും മറ്റ് പരിപാടികളും പൂർണമായും ഒഴിവാക്കി മത്സരം മാത്രമായി നടത്തണമെന്നാണ് ഒരു വിഭാഗം ക്ലബ്ബുകളും സംഘാടകരും ആവശ്യപ്പെടുന്നത്. മാസങ്ങൾ നീണ്ട തയാറെടുപ്പിൽ വലിയ സാമ്പത്തിക നഷ്ടമുണ്ടാകുമെന്ന് ചിലർ ചൂണ്ടിക്കാണിച്ചു. പക്ഷെ ഇത്രയും വലിയ ദുരന്തത്തിന്റെ പശ്ചാത്തലത്തിൽ വള്ളംകളി നടത്തുന്നത് ഉചിതമല്ലെന്ന അഭിപ്രായമാണ് സംഘാടകർക്കടക്കമുള്ളത്. ഇതിന്റെ പശ്ചാതലത്തിലാണ് വള്ളംകളി മാറ്റി വക്കാൻ തീരുമാനമായത്.