ന്യൂഡല്‍ഹി: പ്രതിപക്ഷ പ്രതിഷേധത്തിനിടെ വഖഫ് ഭേദഗതി ബില്‍ ലോക്‌സഭയില്‍ അവതരിപ്പിച്ചു. വഖഫ് ആക്ടിലെ ഭേദഗതികള്‍ എതിര്‍ക്കുമെന്ന് ഇന്‍ഡ്യ അംഗങ്ങള്‍ പറഞ്ഞു.

ജനങ്ങളെ ഭിന്നിപ്പിക്കാനുള്ള ബില്‍ എന്ന് കോണ്‍ഗ്രസ് ചൂണ്ടിക്കാട്ടി. സ്വാതന്ത്ര്യത്തിനും മതത്തിനും നേരയുള്ള ആക്രമണം. മുസ്‌ലിം ഇതര വിഭാഗങ്ങള്‍ എത്തുന്നത് മതസ്വാതന്ത്ര്യത്തിന് മേലുള്ള വെല്ലുവിളി. രാമക്ഷേത്ര ഭരണസമിതിയില്‍ അഹിന്ദുക്കളെ അംഗങ്ങളാക്കുമോ എന്ന് ചോദിച്ച കോണ്‍ഗ്രസ് ഭരണഘടനക്ക് നേരെയുള്ള ആക്രമണമാണെന്നും ചൂണ്ടിക്കാട്ടി. മതപരമായ വിഷയത്തിലുള്ള ഇടപെടലെന്ന് കോണ്‍ഗ്രസ് കൂട്ടിച്ചേര്‍ത്തു.

വഖഫ് ബോര്‍ഡിന്റെയും വഖഫ് കൗണ്‍സിലിന്റെയും അധികാരങ്ങളെ തകര്‍ക്കുന്നതാണിതെന്ന് എന്‍.കെ പ്രേമചന്ദ്രന്‍ എം.പി പറഞ്ഞു. ദേവസ്വം ബോര്‍ഡില്‍ ഹിന്ദുവല്ലാത്ത ആളെ ഉള്‍പെടുത്തുമോയെന്ന് കെ.സി വേണുഗോപാല്‍ ചോദിച്ചു. 
ഇത് ഭരണഘടന തത്വങ്ങള്‍ക്ക് വിരുദ്ധമാണ്. ഈ നിയമം ജുഡീഷ്യല്‍ പരിശോധനയ്ക്ക് വിധേയമാക്കിയാല്‍ അത് തീര്‍ച്ചയായും റദ്ദാക്കപ്പെടുമെന്ന് മുന്നറിയിപ്പ് നല്‍കുന്നെന്നും അദ്ദേഹം പറഞ്ഞു.

മതേതരത്വത്തിന് മേലുള്ള കടന്നു കയറ്റമെന്ന് ഇ.ടി മുഹമ്മദ് ബഷീര്‍ ചൂണ്ടിക്കാട്ടി. ബില്‍ ഭരണഘടനാവിരുദ്ധമെന്ന് തൃണമൂല്‍ കോണ്‍ഗ്രസ് അംഗങ്ങള്‍ പറഞ്ഞു. മുസ്‌ലിങ്ങളോടുള്ള വിവേചനമാണ് ബില്ലെന്ന് സമാജ് വാദി പാര്‍ട്ടി തുറന്നടിച്ചു. വഖഫ് ഭേദഗതി ബില്‍ ഭൂമി വില്‍പ്പനക്കുള്ള ബി.ജെ.പി അംഗങ്ങളുടെ താല്‍പ്പര്യാര്‍ത്ഥമുള്ള ഒഴികഴിവ് മാത്രമാണെന്ന് അഖിലേഷ് യാദവ് വിമര്‍ശിച്ചു.
 
ബി.ജെ.പി രാജ്യത്തെ മുക്കിക്കൊണ്ടിരിക്കുകയാണ്. നിങ്ങള്‍ മുസ്‌ലിംകളുടെ ശത്രുവാണ് എന്നാണ് അസദുദ്ദീന്‍ ഉവൈസി ബില്ലിനെ വിമര്‍ശിച്ച് പറഞ്ഞത്.

വഖഫ് ഭേദഗതിയെ കുറിച്ച് എം.പിമാര്‍ അറിഞ്ഞത് പാര്‍ലമെന്റില്‍ നിന്നല്ലെന്നും മാധ്യമങ്ങളിലൂടെയാണെന്നും സുപ്രിയ സുലെ എം.പി കുറ്റപ്പെടുത്തി. ബില്ലുകള്‍ അവതരിപ്പിക്കാനുള്ള പുതിയ വഴി ഇതാണോ എന്നും വഖഫ് ഭേദഗതി ബില്‍ പിന്‍വലിക്കണമെന്നും അവര്‍ ആവശ്യപ്പെട്ടു.

ബില്‍ ജനദ്രോഹമെന്ന് ഡി.എം.കെ ചൂണ്ടിക്കാട്ടി. ന്യൂനപക്ഷങ്ങള്‍ക്ക് അവരുടെ സ്ഥാപനങ്ങള്‍ ഭരിക്കുന്നതിനുള്ള ആര്‍ട്ടിക്കിള്‍ 30 ന്റെ നേരിട്ടുള്ള ലംഘനമാണിതെന്നും ഈ ബില്‍ ഒരു പ്രത്യേക മതവിഭാഗത്തെ ലക്ഷ്യമിടുന്നതാണെന്നും ഡി.എം.കെ എം.പി കനിമൊഴി പറഞ്ഞു.

The Waqf Amendment Bill has been introduced in the Lok Sabha amidst strong opposition protests