വാഷിങ്ടണ്‍: 10 ദിവസത്തെ ദൗത്യത്തിനായി ബോയിങിന്റെ സ്റ്റാര്‍ലൈന്‍ അന്താരാഷ്ട്ര ബഹിരാകാശ നിലയത്തിലേക്കെത്തിയ ഇന്ത്യന്‍ വംശജയും ബഹിരാകാശ സഞ്ചാരിയുമായ സുനിത വില്യംസിന്റെയും ബുച്ച് വില്‍മോറിന്റെയും മടക്കയാത്ര ഇനിയും നീളും. എന്നാല്‍, സാങ്കേതിക തകരാറുകള്‍ കാരണം ഇരുവരുടെയും യാത്ര പല തവണയായി നീളുകയായിരുന്നു.

2025 ഫെബ്രുവരിയില്‍ സ്‌പേസ് എക്‌സിന്റെ ക്രൂ ഡ്രാഗണില്‍ ഇവരെ ഭൂമിയിലേക്ക് തിരിച്ചെത്തിക്കാന്‍ സാധിക്കുമെന്നാണ് പ്രതീക്ഷിക്കുന്നതെന്നാണ് നാസ നല്‍കുന്ന പുതിയ വിവരം. രണ്ടുമാസത്തിലേറായായി ഇവര്‍ ബഹിരാകാശ നിലയത്തില്‍ കുടുങ്ങിക്കിടക്കുകയാണ്.

ജൂണ്‍ 5നായിരുന്നു വില്യംസും വില്‍മോറും ബോയിങ് സ്റ്റാര്‍ലൈനര്‍ പേടകത്തില്‍ അന്താരാഷ്ട്ര ബഹിരാകാശ നിലയത്തിലേക്ക് യാത്ര പോയത്. 24 മണിക്കൂറോടെ ഇരുവരും അവിടെയെത്തി. യാത്രസുരക്ഷിതമായിരുന്നു. 8 ദിവസം കൊണ്ട് മടങ്ങാനായിരുന്നു പദ്ധതി.
ആദ്യം ജൂണ്‍ 13നും പിന്നീടത് ജൂലൈ 26 ലേക്കുമായി മാറ്റിവച്ചു.  

ബോയിങ് സ്റ്റാര്‍ലൈനര്‍ ക്യാപ്‌സൂളുമായി ബന്ധപ്പെട്ട പ്രശ്‌നങ്ങള്‍ കാരണമാണ് ഇവര്‍ക്ക് അവിടെ നിന്നു മടങ്ങാന്‍ സാധിക്കാത്തത്. സ്റ്റാര്‍ലൈനര്‍ പേടകത്തിന്റെ ത്രസ്റ്ററുകള്‍ക്കുണ്ടായ തകരാറും ഹീലിയം ചോര്‍ച്ചയും ഇരുവരുടെയും ദൗത്യം നീട്ടിക്കൊണ്ടുപോവുകയായിരുന്നു.