എല്ലുകള്‍ക്കും പല്ലുകള്‍ക്കും എന്നുവേണ്ട ശരീരത്തിന് ഏറ്റവും അവശ്യമായ ധാതുവാണ് കാത്സ്യം. പല കാരണങ്ങള്‍ കൊണ്ടും ശരീരത്തില്‍ കാത്സ്യം കുറയാറുണ്ട്. ഇത്തരത്തില്‍ ശരീരത്തില്‍ കാത്സ്യം കുറയുമ്പോള്‍ അത് പല ആരോഗ്യ പ്രശ്‌നങ്ങളും ഉണ്ടാക്കുന്നുണ്ട്. ഹൃദയത്തിന്റെയും പേശികളുടെയും ശരിയായ പ്രവര്‍ത്തനത്തിനും കാത്സ്യം പ്രധാനമാണ്. 

പേശികള്‍ക്ക് ഉണ്ടാകുന്ന പ്രശ്‌നങ്ങളാണ് കാത്സ്യം കുറയുന്നതിന്റെ പ്രധാന സൂചന. പേശിവലിവ്, കൈകാല്‍ മരവിപ്പ്, നടക്കുമ്പോ തുടകള്‍ക്കും കൈകള്‍ക്കും വേദന അനുഭവപ്പെടുക തുടങ്ങിയവ കാത്സ്യ കുറവിന്റെ ലക്ഷണങ്ങളാണ്. എല്ലിന്റെ തേയ്മാനത്തിനും അഥവാ ഓസ്റ്റിയോപൊറോസിസ് സാധ്യത കൂടാനും ഇത് കാരണമാകുന്നുണ്ട്. പല്ലുകള്‍ പൊട്ടുന്നതും പല്ലുകള്‍ പെട്ടെന്ന് കേടാവുന്നതും പല്ലിന്റെ ഇനാമലിന് ഉണ്ടാകുന്ന മറ്റ് പ്രശ്‌നങ്ങളും കാത്സ്യം കുറവിന്റെ  ലക്ഷണമാകാം.

നഖങ്ങളുടെ ആരോഗ്യത്തിനും കാത്സ്യം അത്യാവശ്യമാണ്. പെട്ടെന്ന് പൊട്ടുന്ന നഖങ്ങള്‍  കാത്സ്യത്തിന്റെ കുറവിനെ സൂചിപ്പിക്കുന്നു. അതുപോലെ വരണ്ട നഖങ്ങള്‍, വരണ്ട ചര്‍മ്മം, പരുപരുത്ത തലമുടി, ചര്‍മ്മത്തിലുണ്ടാവുന്ന ചൊറിച്ചില്‍ തുടങ്ങിയവയൊക്കെ കാത്സ്യം കുറവ് മൂലം ഉണ്ടാകാം. രണ്ടുതരത്തിലാണ് ശരീരം കാല്‍സ്യം കണ്ടെത്തുന്നത്. നാം കഴിക്കുന്ന ഭക്ഷണത്തില്‍ നിന്നും മററു സപ്ലിമെന്റുകളില്‍ നിന്നും. മറ്റൊന്ന്, എല്ലുകളില്‍ നിന്ന്. നാംകഴിക്കുന്ന ഭക്ഷണത്തില്‍ ആവശ്യമുള്ള കാല്‍സ്യം ലഭിക്കാതെ വരുമ്പോള്‍ ശരീരം എല്ലുകളില്‍ ശേഖരിച്ചുവച്ച കാല്‍സ്യം ഉപയോഗപ്പെടുത്തുന്നു. പിന്നീട് ഭക്ഷണത്തില്‍ നിന്നു കിട്ടുമ്പോള്‍ എല്ലുകളില്‍ വീണ്ടും പുനഃസ്ഥാപിക്കുന്നു.

ക്ഷീണം പല രോഗങ്ങളുടെയും ലക്ഷണം ആണെങ്കില്‍ പോലും കാത്സ്യത്തിന്റെ കുറവിനെ സൂചിപ്പിക്കുന്ന ലക്ഷണമായി അമിത ക്ഷീണവും ഉണ്ടാകാം. മാത്രമല്ല, ചിലരില്‍ ഓര്‍മ്മക്കുറവ്, വിഷാദം, മറ്റ് മാനസിക പ്രശ്‌നങ്ങള്‍ തുടങ്ങിയവ കാത്സ്യത്തിന്റെ കുറവ് മൂലം ഉണ്ടാകാം. അതുപോലെ ചിലരില്‍ ഹാര്‍ട്ട് ബീറ്റ് കൂടുന്നതും സ്ത്രീകളില്‍ ആര്‍ത്തവ പ്രശ്‌നങ്ങള്‍ ഉണ്ടാകുന്നതും കാത്സ്യക്കുറവു മൂലമാകാം.  ഇത് പരിഹരിക്കാന്‍ കാത്സ്യം അടങ്ങിയ ഭക്ഷണങ്ങള്‍ കഴിക്കുന്നത് വളരെ നല്ലതാണ്. പാല്‍, തൈര്, ചീസ്, യോഗര്‍ട്ട്, മുട്ട, ബദാം, സോയാ മില്‍ക്ക്, എള്ള്, ചിയ വിത്തുകള്‍, വെണ്ടയ്ക്ക, മത്തി, ഇലക്കറികള്‍, ബീന്‍സ്, മത്സ്യം, നട്‌സ്  തുടങ്ങിയവയില്‍ ധാരാളം കാത്സ്യം അടങ്ങിയിട്ടുണ്ട്. 

Calcium is essential for healthy bones, teeth, and overall bodily functions. Learn about the symptoms of calcium deficiency, its impact on health, and the best dietary sources to maintain optimal calcium levels