ന്യൂഡല്‍ഹി: ഒളിമ്പിക്‌സിലെ ഇന്ത്യയുടെ മോശം പ്രകടനത്തിന് കാരണം ഗുസ്തിതാരങ്ങളുടെ പ്രക്ഷോഭമാണെന്ന 'കണ്ടെത്തലുമായി' ഇന്ത്യന്‍ ഗുസ്തി ഫെഡറേഷന്‍ മേധാവി സഞ്ജയ് സിങ്.

'മറ്റൊരു കോണില്‍ നിരീക്ഷിച്ചാല്‍ നിങ്ങള്‍ക്ക് കാര്യങ്ങള്‍ മനസ്സിലാക്കാം. ഗുസ്തിതാരങ്ങളുടെ പ്രതിഷേധം 15 മാസത്തോളമാണ് നീണ്ടു നിന്നത്. ഇത് റസ്‌ലിങ് മേഖലയെ തന്നെ പിടിച്ചുലച്ചു. ഇതോടൊപ്പം ഇക്കാലയളവില്‍ താരങ്ങള്‍ക്ക് പരിശീലനം നടത്താനും സാധിച്ചില്ല. ഇതവരുടെ പ്രകടനത്തെ ബാധിച്ചു' തന്റെ വാദത്തെ ഇങ്ങനെയാണ് സഞ്ജയ് സിങ് ന്യായീകരിക്കുന്നത്. 

പാരീസ് ഒളിമ്പിക്‌സില്‍ ഇക്കുറി ഗോദയില്‍ നിന്നും ഇന്ത്യക്ക് ഒരു മെഡല്‍ മാത്രമാണ് ലഭിച്ചത്. 57 കിലോ ഫ്രീ സ്‌റ്റൈല്‍ ഗുസ്തിയില്‍ മത്സരിച്ച അമന്‍ ഷെഹ്‌റാവത്തിന് മാത്രമാണ് മെഡല്‍ ലഭിച്ചത്. വെങ്കല മെഡലായിരുന്നു ഷെഹ്‌റാവത്തിന്റെ സമ്പാദ്യം.

അതേസമയം, ഗുസ്തിയില്‍ ഇന്ത്യയുടെ വിനേഷ് ഫോഗട്ട് ഫൈനലിലെത്തിയെങ്കിലും ഭാരകൂടുതലിന്റെ പേര് പറഞ്ഞ് അവരെ അയോഗ്യയാക്കുകയായിരുന്നു. വെള്ളി മെഡലെങ്കിലും നല്‍കണമെന്ന വിനേഷ് ഫോഗട്ടിന്റെ അപ്പീല്‍ അന്താരാഷ്ട്ര കായിക കോടതിയുടെ പരിഗണനയിലാണ്.