കൊച്ചി: സിനിമാ മേഖലയിലെ സ്ത്രീകളുടെ വെളിപ്പെടുത്തലുകളും പരാതികളും അന്വേഷിക്കുന്ന പ്രത്യേക അന്വേഷണ സംഘത്തിന്റെ ആദ്യ യോഗം ഇന്നു നടക്കും. ക്രൈംബ്രാഞ്ച് എ.ഡി.ജി.പി എച്ച്. വെങ്കിടേഷിന്റെ നേതൃത്വത്തില്‍ ക്രൈം ബ്രാഞ്ച് ആസ്ഥാനത്താകും യോഗം ചേരുക. അന്വേഷണം ഏതു ദിശയില്‍ മുന്നോട്ടു കൊണ്ടുപോകണം എന്നത് സംബന്ധിച്ച മാര്‍ഗനിര്‍ദേശം തയ്യാറാക്കലാണ് യോഗത്തിന്റെ പ്രധാനല ലക്ഷ്യം.

ഇന്നലെ പരാതികള്‍ നല്‍കിയ സ്ത്രീകളുമായും വെളിപ്പെടുത്തല്‍ നടത്തിയവരുമായുമൊക്കെ അന്വേഷണസംഘത്തിലെ വനിതാ ഐ.പി.എസ് ഉദ്യോഗസ്ഥര്‍ സംസാരിച്ചിരുന്നു. പരാതിയിലും വെളിപ്പെടുത്തലിലും ഇവര്‍ ഉറച്ചു തന്നെ നില്‍ക്കുമൊയെന്ന് ഉറപ്പുവരുത്തുകയാണ് ഇനിയുള്ള ദൗത്യം. ലഭിച്ച പരാതികളില്‍ വിവിധ സ്റ്റേഷനുകളില്‍ കേസ് രജിസ്റ്റര്‍ ചെയ്തിട്ടുണ്ടെങ്കിലും പ്രത്യേക അന്വേഷണസംഘം ഇതും പരിശോധിക്കുന്നതാണ്.

ബംഗാളി നടിയുടെ പരാതിയില്‍ എറണാകുളം നോര്‍ത്ത് പൊലിസ് കേസെടുത്തെങ്കിലും ഇത് പ്രത്യേക സംഘത്തിന്റെ പരിധിയിലാണ് വരുക. കൂടുതല്‍ പരാതികള്‍ ഇന്നുണ്ടാകുമെന്ന വിലയിരുത്തലിലാണ് സംഘം. ലഭിക്കുന്ന പരാതികളില്‍ മൊഴി രേഖപ്പെടുത്താനും പരാതി ലഭിക്കാത്തവയില്‍ പ്രാഥമികാന്വേഷണം നടത്താനുമാണ് ആലോചിക്കുന്നത്.