മലപ്പുറം: മലപ്പുറം എം.എസ്.പി സ്‌കൂളിലെ അധ്യാപക നിയമനത്തിലും സുജിത് ദാസിന്റെ കൈകടത്തല്‍.   സ്‌കൂളില്‍ മുന്‍ എസ്പി സുജിത് ദാസ് മുഖ്യമന്ത്രിയുടെ ഉത്തരവ് അട്ടിമറിച്ച് നിയമനം നടത്തിയതായി റിപ്പോര്‍ട്ടുകള്‍ പുറത്ത്. നിയമനം പിഎസ്‌സിക്ക് വിട്ട ഉത്തരവാണ് സുജിത്ദാസ് അട്ടിമറിച്ചത്. 

പണം വാങ്ങിയാണ് സുജിത് ദാസ് നിയമനം നടത്തിയതെന്ന് കെ.എസ്.യു ആരോപിക്കുന്നു. ആഭ്യന്തര വകുപ്പിന് കീഴില്‍ എയ്ഡഡ് പദവിയിലാണ് മലബാര്‍ സ്‌പെഷ്യല്‍ സ്‌കൂള്‍(എം.എസ്.പി) പ്രവര്‍ത്തിക്കുന്നത്. സ്‌കൂളിലെ നിയമനം പി.എസ്.സിക്ക് വിടാന്‍ മുഖ്യമന്ത്രി പിണറായി വിജയന്‍ 2021 ഫെബ്രവരി 7ന് ഉത്തരവിട്ടിരുന്നു. ഇത് ലംഘിച്ചാണ് സ്‌കൂളിന്റെ മാനേജര്‍ കൂടിയായ കമാന്റന്റ് സുജിത് ദാസ് ഉത്തവിറക്കിയത്. 2021 നവംബര്‍ 18നാണ് ഉത്തരവിറക്കിയത്.  വിവിധ അധ്യാപക തസ്തികകളിലേക്ക് എഴുത്ത് പരീക്ഷ നടത്താനായിരുന്നു ഉത്തരവ്.

സര്‍ക്കാര്‍ ഉത്തരവ് അട്ടിമറിച്ച് സുജിത് ദാസ്, സ്‌കൂളില്‍ ആറ് നിയമനങ്ങള്‍ നടത്തിയെന്നാണ് ആരോപണം. സുജിത് ദാസ് എം.എസ്.പിയില്‍ നിന്നും പോയ ശേഷം ബി.ജെ.പി നേതാവും മുന്‍ കേന്ദ്ര ഇന്റലിജന്‍സ് ഉദ്യോഗസ്ഥനുമായ വ്യക്തിയുടെ മകനും സ്‌കൂളില്‍ നിയമനം ലഭിച്ചിരുന്നു. ഇതിനായി ലക്ഷങ്ങള്‍ വാങ്ങിയതായും ആരോപണമുണ്ട്.

എംഎസ്പി സ്‌കൂളില്‍ ഇതുവരെ പിഎസ്‌സി നിയമനം നടന്നിട്ടില്ല. നിരവധി ഒഴിവുകളുണ്ടെങ്കിലും റിപ്പോര്‍ട്ട് ചെയ്യുന്നില്ലെന്നും പരാതിയുണ്ട്.