ന്യൂഡല്‍ഹി: ജയ് ഷാ ഐ.സി.സി അധ്യക്ഷനായതില്‍ ആശങ്കയില്ലെന്ന്  പാകിസ്താന്‍ ക്രിക്കറ്റ് ബോര്‍ഡ് ചെയര്‍മാന്‍ മുഹ്‌സിന്‍ നഖ്‌വി. ജയ് ഷായുമായി ബന്ധപ്പെടുകയാണ്. അദ്ദേഹം ഐ.സി.സി ചെയര്‍മാനായതില്‍ ആശങ്കകളില്ല. സെപ്റ്റംബര്‍ എട്ട് ഒമ്പത് തീയതികളിലായി ഏഷ്യന്‍ ക്രിക്കറ്റ് കൗണ്‍സില്‍ യോഗം നടക്കുമെന്നും അദ്ദേഹം കൂട്ടിച്ചേര്‍ത്തു. യോഗത്തില്‍ സംഘടനയുടെ പുതിയ പ്രസിഡന്റ് ആരാണെന്നതില്‍ ചര്‍ച്ചയുണ്ടാകും. എന്നാല്‍, താന്‍ ഏഷ്യന്‍ ക്രിക്കറ്റ് കൗണ്‍സിലിന്റെ യോഗത്തില്‍ പങ്കെടുക്കില്ലെന്നും സല്‍മാന്‍ നാസിറാവും പാകിസ്താന്‍ ക്രിക്കറ്റ് ബോര്‍ഡിനെ പ്രതിനിധീകരിച്ച് പങ്കെടുക്കുകയെന്നും അദ്ദേഹം പറഞ്ഞു.

ചാമ്പ്യന്‍സ് ട്രോഫിയുമായി ബന്ധപ്പെട്ട വിഷയത്തിലും അദ്ദേഹം പ്രതികരിച്ചു. ചാമ്പ്യന്‍സ് ട്രോഫിയുടെ നടത്തിപ്പില്‍ ബി.സി.സി.ഐയുമായും സംസാരിച്ചിട്ടുണ്ട്. ടൂര്‍ണമെന്റില്‍ പങ്കെടുക്കുന്ന എല്ലാ രാജ്യങ്ങളുമായും ഇക്കാര്യം ചര്‍ച്ച ചെയ്തിട്ടുണ്ടെന്നും അദ്ദേഹം പറഞ്ഞു.

കഴിഞ്ഞ മാസം ഐ.സി.സി ചെയര്‍മാനായി ജയ് ഷാ എതിരില്ലാതെ തെരഞ്ഞെടുക്കപ്പെട്ടിരുന്നു. ഐ.സി.സിയുടെ ഗ്രേക് ബാര്‍ക്ലേയുടെ കാലാവധി പൂര്‍ത്തിയാകുന്ന സാഹചര്യത്തിലായിരുന്നു ജയ് ഷാ ക്രിക്കറ്റ് ബോര്‍ഡിന്റെ ചെയര്‍മാനായത്. ജഗ്മോഹന്‍ ഡാല്‍മി, ശരത് പവാര്‍, എന്‍ ശ്രീനിവാസന്‍, ശശാങ്ക് മനോഹര്‍ തുടങ്ങിയവര്‍ക്ക് ശേഷം ചെയര്‍മാനാകുന്ന ഇന്ത്യക്കാരനാണ് ജയ് ഷാ. ഐ.സി.സിയുടെ ഏറ്റവും പ്രായം കുറഞ്ഞ ചെയര്‍മാനും ജയ് ഷാ തന്നെയാണ്.