തിരുവനന്തപുരം: ചരക്കുകപ്പലായ എംഎസ്‌സി ക്ലോഡ് ഗിറാര്‍ഡെറ്റ് വിഴിഞ്ഞം അന്താരാഷ്ട്ര തുറമുഖത്ത് നങ്കൂരമിട്ടു. ഇന്നേവരെ ഇന്ത്യയിലെത്തിയിട്ടുള്ളതില്‍ ഏറ്റവും വലിയ ചരക്കുകപ്പലാണിത്. മലേഷ്യയില്‍ നിന്നെത്തിയ കപ്പല്‍ കണ്ടെയ്‌നര്‍ ഹാന്‍ഡ്‌ലിങ്ങിന് ശേഷം തിരിച്ചുപോകും. ദക്ഷിണേഷ്യയില്‍ ഇതുവരെ വന്നിട്ടുള്ള ഏറ്റവും വലിയ കപ്പലായ ക്ലോഡ് ഗിറാര്‍ഡെറ്റിന് 399.99 മീറ്റര്‍ നീളവും 61.5 മീറ്റര്‍ വീതിയും 16.6 മീറ്റര്‍ ഉയരവും 24,116 കണ്ടെയ്‌നര്‍ ശേഷിയുമാണുള്ളത്. 

വലിയ തയ്യാറെടുപ്പുകളില്ലാതെ തന്നെ വലിയ കപ്പലുകള്‍ക്ക് സുഗമമായി വിഴിഞ്ഞത്ത് ബെര്‍ത്ത് ചെയ്യാന്‍ സാധിച്ചത് തുറമുറഖത്തിന്റെ പ്രാധാന്യം ഏറെ വര്‍ധിപ്പിച്ചു. ഇത്തരം വലിയ കപ്പലുകള്‍ അടുക്കാന്‍ മറ്റ് തുറമുഖങ്ങളില്‍ പ്രത്യേകം ഡ്രഡ്ജിങ് നടത്തി തുറമുഖത്തോട് ചേര്‍ന്ന ഭാഗത്തിന്റെ ആഴം കൂട്ടണം. എന്നാല്‍ 20 മീറ്ററോളം സ്വാഭാവിക ആഴമുള്ളതാണ് വിഴിഞ്ഞത്തിന്റെ മറ്റൊരു സവിശേഷത.

വിഴിഞ്ഞത് കണ്ടെയ്‌നറുകള്‍ ഇറക്കിയതിന് ശേഷം വെള്ളിയാഴ്ച രാത്രിതന്നെ കപ്പല്‍ പോര്‍ച്ചുഗലിലേക്ക് പോകും. ക്ലോഡ് ഗിറാര്‍ഡെറ്റിന് മുന്‍പ് വിഴിഞ്ഞത്ത് എത്തിയ വലിയ കപ്പല്‍ എം.എസ്.സി അന്നയാണ്. 19462 ടി.ഇ.യു ശേഷിയാണ് കപ്പലിനുണ്ടായിരുന്നത്.  

രാജ്യത്തെ ഏറ്റവും വലിയ മദര്‍ പോര്‍ട്ടായ വിഴിഞ്ഞം തുറമുഖത്തിന് അന്താരാഷ്ട്ര ചരക്ക് ഗതാഗതത്തിനായി ഉപയോഗിക്കുന്ന ഭീമന്‍ കപ്പലുകളെ എളുപ്പത്തില്‍ കൈകാര്യം ചെയ്യാന്‍ സാധിക്കും. കൂടാതെ വിഴിഞ്ഞം തുറമുഖം വഴിയുള്ള ചരക്ക് ഗതാഗതം സജീവമാകുന്നതോടെ കേരളം വലിയ വികസനക്കുതിപ്പിന് സാക്ഷ്യം വഹിക്കും. എംഎസ്‌സി ക്ലോഡ് ഗിറാര്‍ഡെറ്റിന്റെ നങ്കൂരമിടല്‍ അതിലേക്കുള്ള സുപ്രധാന ചുവടുവെപ്പാണ്. നിലവില്‍ ട്രയല്‍ റണ്‍ നടന്നുകൊണ്ടിരിക്കെ തന്നെ വമ്പന്‍ കപ്പലുകളെ കൈകാര്യം ചെയ്യാന്‍ സാധിക്കുമെന്ന് തെളിയിച്ചത് വിഴിഞ്ഞം തുറമുഖത്തിന്റെ പ്രാധാന്യം വര്‍ധിപ്പിക്കുന്നു.

The MSC Cloud Girardeau, the largest cargo ship to ever reach India, has arrived at Vizhinjam Port. This massive vessel marks a significant milestone in India's shipping history, highlighting the country's growing trade and maritime capabilities.