ന്യൂഡല്‍ഹി; ഡല്‍ഹി മുഖ്യമന്ത്രി സ്ഥാനം രാജിവെയ്ക്കാനുള്ള അരവിന്ദ് കെജ് രിവാളിന്റെ തീരുമാനത്തെ വിമര്‍ശിച്ച് കോണ്‍ഗ്രസും, ബിജെപിയും. 48 മണിക്കൂറിന് ശേഷം മുഖ്യമന്ത്രി സ്ഥാനം രാജിവെയ്ക്കാനുള്ള തീരുമാനത്തിനെതിരെയാണ് പ്രതിഷേധം. 

അതേസമയം രാജിക്കായി കെജ്‌രിവാള്‍ തേടിയ 48 മണിക്കൂര്‍ സമയം നിഗൂഢമാണെന്നും നിയമസഭയില്‍ ഭൂരിപക്ഷമുള്ള ഒരു മുഖ്യമന്ത്രി ഇത്തരത്തില്‍ ചെയ്യുന്നത് പരിഹാസ്യമാണെന്നും ബി.ജെ.പി എം.പി സുധാന്‍ഷു ത്രിവേദി വാര്‍ത്തസമ്മേളനത്തില്‍ പറഞ്ഞു. 

രാജി പ്രസംഗത്തിന് പിന്നിലെ നിരാശ എന്താണെന്ന് കെജ് രിവാള്‍ വ്യക്തമാക്കണമെന്നും, പാര്‍ട്ടിക്കുള്ളില്‍ തന്നെ കെജ് രിവാളിനെതിരെ പോരാട്ടം നടക്കുന്നുണ്ടെന്നും ഡല്‍ഹി ബി.ജെ.പി അധ്യക്ഷന്‍ വീരേന്ദ്ര സച്ച്‌ദേവ പറഞ്ഞു. കെജ് രിവാള്‍ പറയുന്നത് സത്യമാണെങ്കില്‍ ഉടനടി മന്ത്രിസഭാ യോഗം വിളിച്ച് നിയമസഭ പിരിച്ച് വിടണമെന്നും അദ്ദേഹം ആവശ്യപ്പെട്ടു. 

കെജ് രിവാളിന്റെ രാജി പ്രഖ്യാപനം പൊളിറ്റിക്കല്‍ സ്റ്റണ്ട് ആണെന്ന് കോണ്‍ഗ്രസ് ആരോപിച്ചു. മുഖ്യമന്ത്രിയെന്ന നിലയില്‍ തനിക്ക് അധികാരമില്ലാത്തതിനാലും, സുപ്രീം കോടതിയുടെ വ്യവസ്ഥകള്‍ക്ക് വിധേയനായതിനാലുമാണ് രാജിയെന്ന് പിസിസി അധ്യക്ഷന്‍ ദേവേന്ദര്‍ യാദവ് പറഞ്ഞു. വരാനിരിക്കുന്ന തെരഞ്ഞെടുപ്പില്‍ ഒരു സ്വാധീനവും കെജ്‌രിവാള്‍ ഉണ്ടാക്കില്ലെന്നും കോണ്‍ഗ്രസ് അദ്ദേഹം അഭിപ്രായപ്പെട്ടു. 

അതേസമയം അടുത്ത വര്‍ഷം ഫെബ്രുവരി വരെയാണ് ഡല്‍ഹി സര്‍ക്കാരിന്റെ കാലാവധി. 70 അംഗ നിയമസഭയില്‍ 61 എം.എല്‍.എമാരാണ് ആപിനുള്ളത്. ബി.ജെ.പിക്ക് 7 അംഗങ്ങളുമുണ്ട്. നിയമസഭയുടെ കാലാവധി തീരാന്‍ 6 മാസം ഇല്ലെന്നിരിക്കെ നിലവിലെ നിയമസഭ പിരിച്ചുവിടാന്‍ കെജ്‌രിവാള്‍ മുതിരില്ലെന്നാണ് സൂചന. 

അതിനിടെ കെജ് രിവാളിന് പകരം ആര് മുഖ്യമന്ത്രി സ്ഥാനത്തെത്തുമെന്ന ചര്‍ച്ചകളും പാര്‍ട്ടിയില്‍ സജീവമാണ്.  കെജ്‌രിവാളിന്റെ ഭാര്യ സുനിതയെ പരിഗണിക്കുന്നതില്‍ ഒരു വിഭാഗത്തിന് എതിര്‍പ്പുണ്ടെന്നാണ് റിപ്പോര്‍ട്ട്.  മനീഷ് സിസോദിയ മുഖ്യമന്ത്രിയാകുന്നതിന് നിയമ തടസമുള്ള സാഹചര്യത്തില്‍ മന്ത്രി അതിഷിയെയോ, സഞ്ജയ് സിങ്ങിനെയോ പരിഗണിക്കാനാണ് സാധ്യത.

Congress and BJP ridiculed Kejriwals resignation announcement Who will replace the Chief Ministers chair