തൊടുപുഴ: മോട്ടോർ വാഹന വകുപ്പിന്റെ പ്രവർത്തനങ്ങൾ ഹൈടെക് ആക്കുന്നതിന്റെ ഭാഗമായി വയർലസ് കമ്യൂണിക്കേഷൻ സംവിധാനം ഏർപ്പെടുത്താനുള്ള തീരുമാനം ശീതീകരണാവസ്ഥയിൽ. ഇതിന്റെ ഭാഗമായി പൊലിസിനും എക്‌സൈസിനും സമാനമായി വിവിധ തസ്തികകൾക്ക് കോഡ് നെയിമും കോൾ സൈനും അനുവദിച്ച് 2022 ജൂൺ 20 ന് ട്രാൻസ്‌പോർട്ട് കമ്മിഷണർ ഉത്തരവ് പുറപ്പെടുവിച്ചിരുന്നു. തുടർനടപടികൾക്കായി 99.98 ലക്ഷം രൂപ സർക്കാർ അനുവദിക്കുകയും ചെയ്തു. പരീക്ഷണാർത്ഥം ഏതാനും എൻഫോഴ്‌സ്‌മെന്റ് ഉദ്യോഗസ്ഥർക്ക് വയർലസ് അനുവദിച്ചിരുന്നെങ്കിലും പിന്നീട് നടപടികളുണ്ടായില്ല. 

എക്‌സൈസ് വകുപ്പിന്റെ വയർലസ് ടവർ പങ്കുവെക്കാനായിരുന്നു മോട്ടോർ വാഹന വകുപ്പിന്റെ തീരുമാനം. പദ്ധതി നടപ്പായാൽ എൻഫോഴ്‌സ്‌മെന്റ് ജോലികൾ കാര്യക്ഷമമാക്കാമെന്നായിരുന്നു വിലയിരുത്തൽ. എൻഫോഴ്‌സ്‌മെന്റ് ജോലികൾ കാര്യക്ഷമമായി നിർവഹിക്കാൻ വയർലസ് സംവിധാനത്തിന്റെ ആവശ്യകത ചുണ്ടിക്കാട്ടി 2020 ൽ മോട്ടോർ വാഹന വകുപ്പ് സർക്കാരിനെ സമീപിച്ചിരുന്നു.

ഉദ്യോഗസ്ഥർ ശരാശരി 1 ലക്ഷം രൂപയുടെ നിയമലംഘനങ്ങൾ കണ്ടെത്തിയിരുന്നു എന്ന് കണക്കാക്കിയാൽ പോലും ഒരു സബ് ആർ.ടി ഓഫിസിൽ ഏറ്റവും കുറഞ്ഞത് 5 ലക്ഷം രൂപ കോംപൗണ്ടിങ് ഫീസ് ഇനത്തിൽ ഓരോ മാസവും സർക്കാരിലേക്ക് വരുമാനമായി ലഭിക്കേണ്ടിയിരുന്നത് നഷ്ടപ്പെടുകയാണ്. റവന്യു ഏണിങ് ഡിപ്പാർട്ട്‌മെന്റായ മോട്ടോർ വാഹന വകുപ്പിന് വാഹനം വാങ്ങാൻ ചെലവഴിക്കേണ്ടിവരുന്ന തുക രണ്ടോ മൂന്നോ മാസം ലഭിക്കുന്ന പിഴത്തുകയിൽ നിന്നു തന്നെ സർക്കാരിന് തിരികെ ലഭിക്കുന്നതാണ്. തുടർന്ന് ലഭിക്കുന്ന പിഴത്തുക മുഴുവൻ ലാഭമാണ്. വാഹനം നൽകാത്തതുമൂലം സർക്കാർ ഖജനാവിലേക്ക് ഈയിനത്തിൽ ലഭിക്കേണ്ട പണം നഷ്ടമായിക്കൊണ്ടിരിക്കുകയാണ്. ടാക്‌സേഷൻ പ്രവർത്തനങ്ങളും യഥാസമയം നടത്താനാവുന്നില്ല.