ന്യൂഡല്‍ഹി: സംസ്ഥാനപദവിയും ഗോത്രപദവിയും നല്‍കുന്ന ഭരണഘടനയുടെ ആറാം ഷെഡ്യൂളില്‍ ലഡാക്കിനെ ഉള്‍പ്പെടുത്തണമെന്ന ആവശ്യം മുന്‍നിര്‍ത്തി കാലാവസ്ഥാ പ്രവര്‍ത്തകന്‍ സോനം വാങ്ചുക്കിന്റെ നേതൃത്വത്തിൽ നടത്തിയ ഡല്‍ഹി മാർച്ച് പൊലിസ് തടഞ്ഞു.

വാങ്ചുക്കും   ലഡാക്ക് എം.പി ഹാജി ഹനീഫ ജാനും ഉള്‍പ്പെടെ 150 ഓളം പേരെ അറസ്റ്റ്‌ചെയ്തു. 'ചലോ ഡല്‍ഹി ക്ലൈമറ്റ് മാര്‍ച്ച്' എന്ന പേരിലുള്ള മാര്‍ച്ച് ഡല്‍ഹി അതിര്‍ത്തിയായ സിംഗുവില്‍വച്ചാണ് തടഞ്ഞത്. കഴിഞ്ഞമാസം ഒന്നിനാണ് 150 പേരുമായി സാമൂഹിക, പരിസ്ഥിതി പ്രവര്‍ത്തകനായ വാങ്ചുക് ലേയില്‍നിന്ന് ഡല്‍ഹിയിലേക്ക് മാര്‍ച്ച് തുടങ്ങിയത്.

മാര്‍ച്ച് തടഞ്ഞ കാര്യം വാങ്ചുക് തന്നെയാണ് സമൂഹമാധ്യമങ്ങളിലൂടെ അറിയിച്ചത്. 'കാര്‍ഗില്‍ ഡെമോക്രാറ്റിക് അലയന്‍സ്', 'ലേ അപെക്‌സ് ബോഡി' എന്നീ സംഘടനകളാണ് 'ചലോ ഡല്‍ഹി ' യാത്രയ്ക്ക് പിന്നില്‍. ലഡാക്കിന്റെ സംസ്ഥാനപദവിയുള്‍പ്പെടെയുള്ള ആവശ്യങ്ങളുന്നയിച്ച് നാലുവര്‍ഷമായി വിവിധ സരമപരിപാടികള്‍ക്ക് നേതൃത്വം നല്‍കിവരികയാണ് ഈ രണ്ടുകൂട്ടായ്മകളും.

വിദ്യാഭ്യാസ പരിഷ്‌കര്‍ത്താവ് കൂടിയായ വാങ്ചുക്കിനെ അറസ്റ്റ്‌ചെയ്ത നടപടിക്കെതിരേ പ്രതിപക്ഷകക്ഷികള്‍ രംഗത്തുവന്നു. മാര്‍ച്ച് തടഞ്ഞ പൊലിസിന്റെ നടപടി അന്യായമാണെന്ന് പ്രതിപക്ഷ നേതാവ് രാഹുല്‍ ഗാന്ധി പറഞ്ഞു. പൊലിസ് നടപടിയെ ഡല്‍ഹി മുഖ്യമന്ത്രി അതിഷി മര്‍ലേനയും അപലപിച്ചു. 

സമരം ഡല്‍ഹിയില്‍ പ്രവേശിക്കുന്നതിനോടനുബന്ധിച്ച് രാജ്യ തലസ്ഥാനനഗരിയില്‍ വിവിധ പരിപാടികള്‍ സംഘടിപ്പിച്ചിരുന്നു. ഇതോടെ പ്രതിഷേധപരിപാടികള്‍ക്ക് വിലക്കേര്‍പ്പെടുത്തി ഡൽഹിയിൽ അഞ്ചുദിവസത്തേക്ക് നിരോധനാജ്ഞ പ്രഖ്യാപിച്ചു.