മനാമ: സുരക്ഷാ സാഹചര്യം കടുപ്പം പ്രാപിച്ചതിനെ തുടര്‍ന്ന് ബഹ്‌റൈനില്‍ വിമാന സര്‍വീസുകള്‍ തുടര്‍ച്ചയായി അഞ്ചാം ദിവസവും നിര്‍ത്തിവെച്ചിരിക്കുകയാണ്. വ്യോമപരിധി താല്‍ക്കാലികമായി അടച്ചതോടെ രാജ്യത്തെത്താനും രാജ്യം വിടാനുംമിരുന്ന ആയിരക്കണക്കിന് യാത്രക്കാരാണ് അനിശ്ചിതത്വത്തിലായത്. വിമാന റദ്ദാക്കലുകളും സമയമാറ്റങ്ങളും യാത്രാ പദ്ധതികളെ വ്യാപകമായി ബാധിച്ചു.

പ്രാദേശിക സംഘര്‍ഷാവസ്ഥയും ഉയര്‍ന്ന സുരക്ഷാ ഭീഷണികളും പരിഗണിച്ചാണ് ബഹ്‌റൈന്‍ ഇന്റര്‍നാഷണല്‍ എയര്‍പോര്‍ട്ടിലെ വരവ്-പോക്ക് സര്‍വീസുകള്‍ നിര്‍ത്തിവെച്ചത്. വ്യോമഗതാഗത നിയന്ത്രണങ്ങള്‍ ഏര്‍പ്പെടുത്തിയതോടെ ദേശീയ വിമാനക്കമ്പനിയായ ഗള്‍ഫ് എയര്‍ ഉള്‍പ്പെടെയുള്ള എയര്‍ലൈന്‍സുകള്‍ സര്‍വീസുകള്‍ താല്‍ക്കാലികമായി റദ്ദാക്കിയതായി അറിയിച്ചു. സുരക്ഷാ ഏജന്‍സികളില്‍ നിന്ന് അന്തിമ അനുമതി ലഭിക്കുന്നതുവരെ സര്‍വീസുകള്‍ പുനരാരംഭിക്കില്ലെന്നാണ് വിമാനക്കമ്പനികളുടെ നിലപാട്.

ബഹ്‌റൈനെ ഇതോടെ ട്രാന്‍സിറ്റ് ഹബ്ബായി ആശ്രയിച്ചിരുന്ന യാത്രക്കാരും കടുത്ത ബുദ്ധിമുട്ടിലായി. യൂറോപ്പ്, ഏഷ്യ, ഇന്ത്യ, മറ്റു ഗള്‍ഫ് രാജ്യങ്ങള്‍ എന്നിവിടങ്ങളിലേക്കുള്ള കണക്റ്റിംഗ് വിമാനങ്ങള്‍ ഉള്‍പ്പെടെ നിരവധി സര്‍വീസുകള്‍ റദ്ദാക്കപ്പെട്ടു. ഹോട്ടല്‍ ബുക്കിംഗുകളും ബിസിനസ് മീറ്റിംഗുകളും അടിയന്തര യാത്രകളും തടസപ്പെട്ടു. വിദേശത്തേക്ക് തൊഴില്‍ ആവശ്യങ്ങള്‍ക്കായി മടങ്ങേണ്ടവരും നാട്ടിലേക്ക് പോകേണ്ട പ്രവാസികളും പ്രതിസന്ധിയിലാണ്.

വിമാനത്താവളത്തില്‍ അനാവശ്യ തിരക്ക് ഒഴിവാക്കുന്നതിനായി യാത്രക്കാര്‍ പുറപ്പെടുന്നതിന് മുന്‍പ് ബന്ധപ്പെട്ട എയര്‍ലൈന്‍സുകളുടെ ഔദ്യോഗിക വെബ്‌സൈറ്റുകളിലോ മൊബൈല്‍ ആപ്പുകളിലോ നിന്ന് പുതുക്കിയ വിവരങ്ങള്‍ നിര്‍ബന്ധമായും പരിശോധിക്കണമെന്ന് അധികൃതര്‍ ആവര്‍ത്തിച്ചു. റീഫണ്ട്, റീഷെഡ്യൂളിംഗ്, വൗച്ചര്‍ സൗകര്യങ്ങള്‍ ലഭ്യമാക്കുന്നതായി വിമാനക്കമ്പനികള്‍ അറിയിച്ചു. ചില എയര്‍ലൈന്‍സുകള്‍ അധിക ഹെല്‍പ്‌ലൈന്‍ സംവിധാനങ്ങളും പ്രവര്‍ത്തനസജ്ജമാക്കിയിട്ടുണ്ട്. ALSO READ: സംഘര്‍ഷാവസ്ഥയ്ക്കിടെ ആത്മവിശ്വാസ സന്ദേശവുമായി ബഹ്‌റൈനില്‍ കിരീടാവകാശിയുടെ സന്ദര്‍ശനം

വിമാന സര്‍വീസുകള്‍ നിര്‍ത്തിയിരിക്കുന്നതിനിടെ ബഹ്‌റൈനും സൗദി അറേബ്യയും ബന്ധിപ്പിക്കുന്ന കിങ് ഫഹദ് കോസ് വേ റോഡ് ഗതാഗതം സാധാരണ നിലയില്‍ തുടരുന്നു. അത്യാവശ്യ യാത്രകള്‍ക്കായി ചിലര്‍ ഈ മാര്‍ഗം ആശ്രയിക്കുന്നുണ്ടെങ്കിലും എല്ലാവര്‍ക്കും അത് പ്രായോഗികമല്ല. പ്രത്യേകിച്ച് ദൂരദേശങ്ങളിലേക്കുള്ള അന്താരാഷ്ട്ര യാത്രകള്‍ക്കായി വിമാന സര്‍വീസുകള്‍ പുനരാരംഭിക്കപ്പെടുന്നതുവരെ കാത്തിരിക്കേണ്ട സാഹചര്യമാണുള്ളത്.

വ്യോമഗതാഗത അധികാരികള്‍ സുരക്ഷാ സ്ഥിതിഗതികള്‍ നിരന്തരം വിലയിരുത്തുന്നുണ്ടെന്നും സാഹചര്യം അനുകൂലമായാല്‍ ഘട്ടംഘട്ടമായി സര്‍വീസുകള്‍ പുനരാരംഭിക്കാനുള്ള ഒരുക്കങ്ങള്‍ പുരോഗമിക്കുന്നുണ്ടെന്നും അറിയിച്ചു. എന്നാല്‍ സര്‍വീസുകള്‍ പൂര്‍ണമായും സാധാരണ നിലയിലാകാനുള്ള കൃത്യമായ സമയക്രമം ഇതുവരെ പ്രഖ്യാപിച്ചിട്ടില്ല.

അഞ്ചാം ദിവസവും തുടരുന്ന വിമാന ഗതാഗത തടസ്സം ടൂറിസം, വ്യാപാരം, ചരക്ക് ഗതാഗതം തുടങ്ങിയ മേഖലകളിലും പ്രതിഫലനം സൃഷ്ടിക്കുന്നതായി വിലയിരുത്തപ്പെടുന്നു. യാത്രക്കാരുടെ സുരക്ഷയ്ക്കാണ് പരമപ്രാധാന്യം നല്‍കുന്നതെന്നും സുരക്ഷ ഉറപ്പായ ശേഷം മാത്രമേ സര്‍വീസുകള്‍ പുനരാരംഭിക്കുകയുള്ളൂവെന്നും ബന്ധപ്പെട്ട വൃത്തങ്ങള്‍ വ്യക്തമാക്കി.

സുരക്ഷാ സാഹചര്യം മെച്ചപ്പെട്ടതോടെ വിമാന ഗതാഗതം ഉടന്‍ പൂര്‍ണമായും സാധാരണ നിലയിലാകുമെന്ന പ്രതീക്ഷയിലാണ് യാത്രക്കാരും വിമാനമേഖലയും.

Flight services in Bahrain remain suspended for the fifth consecutive day amid regional security tensions. Authorities continue to assess safety conditions as thousands of passengers face travel disruption and uncertainty.