ന്യൂഡല്‍ഹി: കുപ്രസിദ്ധ ഗുണ്ടാ നേതാവ് ലോറന്‍സ് ബിഷ്‌ണോയിയുടെ സഹോദരന്‍ അന്‍മോല്‍ ബിഷ്‌ണോയിയെ കുറിച്ച് വിവരം നല്‍കുന്നവര്‍ക്ക് 10 ലക്ഷം രൂപ പാരിതോഷികം പ്രഖ്യാപിച്ച് ദേശീയ അന്വേഷ ഏജന്‍സി (എന്‍.ഐ.എ). എന്‍.സി.പി നേതാവ് ബാബ സിദ്ധിഖിയുടെ കൊലപാതകത്തില്‍ അന്‍മോലിന് പങ്കുണ്ടെന്ന് എന്‍.ഐ.എ വ്യക്തമാക്കിയിരുന്നു. പിന്നാലെയാണ് ഇയാളെ കണ്ടെത്തുന്നതിനുള്ള നീക്കം ഊര്‍ജിതമാക്കിയത്.

പഞ്ചാബി ഗായകന്‍ സിദ്ധു മൂസേവാലയുടെ കൊലപാതകവുമായി ബന്ധപ്പെട്ടും അന്‍മോലിനെതിരെ കേസെടുത്തിട്ടുണ്ട്. 2022 മെയിലായിരുന്നു മൂസേവാല വെടിയേറ്റ് കൊല്ലപ്പെട്ടത്. ഇത് കൂടാതെ വേറെയും കേസുകളില്‍ ഇയാള്‍ പ്രതിയാണ്. 

സിദ്ദിഖിയുടെ കൊലപാതകത്തിനു പിന്നില്‍ ലോറന്‍സ് ബിഷ്‌ണോയിയുടെ നേതൃത്വത്തിലുള്ള ഗുണ്ടാ സംഘമായിരുന്നുവെന്ന് തെളിഞ്ഞിട്ടുണ്ട്. അദ്ദേഹത്തെ കൊല്ലാന്‍ ഉത്തരവിട്ടത് അന്‍മോല്‍ ബിഷ്‌ണോയി ആണെന്നാണ് അന്വേഷണ സംഘത്തിന്റെ കണ്ടെത്തല്‍. സംഘത്തിലെ മൂന്ന് ഷൂട്ടര്‍മാരുമായി അന്‍മോല്‍ മെസ്സേജിങ് ആപ് വഴി ബന്ധപ്പെടുകയും നിര്‍ദേശങ്ങള്‍ നല്‍കുകയും ചെയ്തതായി അന്വേ,ണ സംഘം പറയുന്നു. സിദ്ദിഖിയുടെയും മകന്റെയും ചിത്രങ്ങള്‍ അന്‍മോല്‍ ബിഷ്‌ണോയിയാണ് കൊലയാളികള്‍ക്ക് അയച്ചുകൊടുത്തതെന്നും സംഘം കണ്ടെത്തിയിട്ടുണ്ട്.

നടന്‍ സല്‍മാന്‍ ഖാന്റെ വീടിനുമുന്നില്‍ വെടിവെപ്പ് നടത്തി കൊല്ലുമെന്ന് ഭീഷണിപ്പെടുത്തിയ സംഭവത്തിലും ഇയാളെ പൊലിസ് തെരയുന്നുണ്ട. സംഭവത്തിന് പിന്നാല അന്‍മോലിനെതിരെ ലുക്ക്ഔട്ട് നോട്ടിസ് പുറത്തിറക്കിയിരുന്നു. അതേസമയം, ഇയാള്‍ വിദേശത്തേക്ക് കടന്നതായാണ് വിവരം.