പട്‌ന: ബീഹാറില്‍ മസ്ജിദിന് മുകളില്‍ ഇസ്‌റാഈല്‍ പതാക ഉയര്‍ത്തി ഹിന്ദുത്വര്‍. ഇതോടൊപ്പം സംഘം കാവിക്കൊടിയും നാട്ടി. ബീഹാറിലെ ഭഗല്‍പൂരില്‍ കാളി വിസര്‍ജ്ജന്‍ യാത്രക്കിടെ ലാല്‍മതിയ പൊലിസ് സ്റ്റേഷന്‍ പരിധിയിലെ തംതം ചൗക്കിന് സമീപമാണ് സംഭവം. ഇതേ തുടര്‍ന്ന് പ്രദേശത്തു സംഘര്‍ഷാവസ്ഥ ഉണ്ടായതായും റിപ്പോര്‍ട്ടുകള്‍ പറയുന്നു. 

സംഭവത്തിന്റെ വീഡിയോ പുറത്തു വന്നിട്ടുണ്ട്. ഒരു സംഘം തീവ്ര ഹിന്ദുത്വ വാദികള്‍ മസ്ജിദ് താഴികക്കുടങ്ങളിലേക്ക് കയറുന്നതും ഒരു വലിയ കാവി പതാക അവിടെ സ്ഥാപിക്കുന്നതും കാണിക്കുന്ന വീഡിയോയിലുണ്ട്. മറ്റൊരു സംഘം ഇസ്‌റാഈല്‍ പതാകയും നാട്ടുന്നു. ഒരാള്‍ താഴികക്കുടത്തിലേക്ക് കയറി കാവി കൊടി മാറ്റുമ്പോള്‍ ഇസ്‌റാഈലി പതാക വീശുന്ന സംഘം ആ വ്യക്തിയെ പ്രോത്സാഹിപ്പിക്കുന്നതും ദൃശ്യത്തില്‍ കാണാം.

അവര്‍ തന്നെ പകര്‍ത്തിയ ദൃശ്യങ്ങള്‍ മുസ്‌ലിം സമുദായത്തെ അപമാനിക്കുന്ന ഗാനങ്ങള്‍ക്കൊപ്പം പിന്നീട് ഇന്‍സ്റ്റാഗ്രാമില്‍ പങ്കിടുകയും ചെയ്തു. ഇത് സംഘര്‍ഷങ്ങള്‍ക്ക് ആക്കം കൂട്ടി.

സംഭവത്തില്‍ എഫ്.ഐ.ആര്‍ രജിസ്റ്റര്‍ ചെയ്തിട്ടുണ്ടെന്നും അന്വേഷണം ആരംഭിച്ചിട്ടുണ്ടെന്നും പൊലീസ് പറഞ്ഞു.