വെള്ളറട: പരിസ്ഥിതി സുവര്‍ണ്ണ മുദ്ര പുരസ്‌കാരം പത്മശ്രീ ജി. ശങ്കറിന് ദേവസ്വം മന്ത്രി കടകംപള്ളി സുരേന്ദ്രന്‍ സമര്‍പ്പിച്ചു. ഒറ്റശേഖരമംഗലം ജനാര്‍ദനപുരം എച്ച്.എസ്.എസിന്റെ വജ്രജൂബിലിയുടെ ഭാഗമായിട്ടാണ് പുരസ്‌കാര സമര്‍പ്പണം സംഘടിപ്പിച്ചത്. ഡി.സുകുദേവന്‍ നായര്‍ അധ്യക്ഷനായി. ചടങ്ങില്‍ പി.കെ.വി.സ്മാരക ലൈബ്രറിയുടെ ഉദ്ഘാടനം ഡെപ്യൂട്ടി സ്പീക്കര്‍ വി.ശശിയും പ്രൊഫ. മുണ്ടശ്ശേരി സ്മാരക മന്ദിര ഉദ്ഘാടനം മുന്‍ എം.പി.എം.പി.അച്യുതനും പൂര്‍വ്വ പ്രഥമ അധ്യാപകരെ ആദരിക്കല്‍ സി.കെ.ഹരീന്ദ്രന്‍ എം.എല്‍.എ.യുംനിര്‍വഹിച്ചു. സ്‌കൂള്‍ മാനേജര്‍ അഡ്വ:ജെ.വേണുഗോപാലന്‍ നായര്‍, പിരപ്പന്‍കോട് മുരളി, ഗ്രാമപഞ്ചായത്ത് പ്രസിഡന്റ് എല്‍.വി. അജയകുമാര്‍, കവി മുരുകന്‍ കാട്ടാക്കട, വിനോദ് വൈശാഖി, പി.സുജാത കുമാരി തുടങ്ങിയവര്‍ സംസാരിച്ചു.