കൊച്ചി: സിപിഎം നേതാവും മുൻ മന്ത്രിയുമായ കടകംപള്ളി സുരേന്ദ്രനെതിരെ ഡിജിപിക്ക് പരാതി നൽകി ശബരിമല സ്വർണ്ണക്കൊള്ള കേസ് പ്രതി ഉണ്ണികൃഷ്ണൻ പോറ്റി. ഭൂമി തട്ടിപ്പ് പരാതി നൽകിയതിന് പിന്നിൽ കടകംപള്ളി സുരേന്ദ്രൻ ആണെന്നാണ് ഉണ്ണികൃഷ്ണൻ പോറ്റി ആരോപിക്കുന്നത്. 

തനിക്കെതിരെ കടകംപള്ളി സുരേന്ദ്രൻ ഗൂഢാലോചന നടത്തിയെന്നാണ് പരാതിയിൽ പറയുന്നത്. താൻ പുറത്തിറങ്ങുന്നത് തടയാൻ കടകംപള്ളി ശ്രമിക്കുകയാണെന്നും കടകംപള്ളിക്കെതിരെ അന്വേഷണം വേണമെന്നും പരാതിയിൽ പോറ്റി ആവശ്യപ്പെടുന്നുണ്ട്.

പോറ്റി ജാമ്യം ലഭിച്ച് പുറത്തിറങ്ങിയത് പിന്നാലെയാണ് കഴക്കൂട്ടം സ്വദേശിനി പരാതി നൽകിയത്. ഭൂമി തട്ടിപ്പുമായി ബന്ധപ്പെട്ടുള്ളതായിരുന്നു പരാതി. ഈടായി വാങ്ങിയ ഭൂമി ഉണ്ണികൃഷ്ണൻ പോറ്റി മറിച്ച് വിറ്റുവെന്നായിരുന്നു കഴക്കൂട്ടം സ്വദേശിനി നൽകിയ പരാതി. 2020ലാണ് ഉണ്ണികൃഷ്ണൻ പോറ്റി ഭൂമി തട്ടിപ്പ് നടത്തിയിരുന്നത്. 

കഴക്കൂട്ടം സ്വദേശിനിയെ കൊണ്ട് തനിക്കെതിരെ പരാതി നൽകിപ്പിച്ചുവെന്നും പോറ്റി ആരോപിച്ചു.  ഭൂമി വിലക്ക് വാങ്ങിയതാണെന്നും പോറ്റി പറയുന്നുണ്ട്.  സാമ്പത്തിക പ്രതിസന്ധിയിലായ കഴക്കൂട്ടം സ്വദേശിനിയെ സഹായിക്കാനായി കടകംപള്ളി ആവശ്യപ്പെട്ടിരുന്നുവെന്നും പോറ്റി വ്യക്തമാക്കി. തന്നെ കുരുക്കാനും വിവാദങ്ങൾ വഴിതിരിക്കാനുമാണ് പരാതിയെന്നും പോറ്റി പറഞ്ഞു.