കൊല്ലം: കൊല്ലം കുന്നത്തൂര്‍ തുരുത്തിക്കര എം.ടി.യു.പി.എസ്സ് സ്‌കൂളിലെ കിണറ്റില്‍ വീണ ആറാം ക്ലാസ്സുകാരന്റെ ആരോഗ്യനില തൃപ്തികരം. കുട്ടിയെ വെന്റിലേറ്ററില്‍ നിന്ന് മാറ്റി. രാവിലെ കുട്ടി രക്ഷിതാക്കളുമായി സംസാരിച്ചു. ഇന്നലെ രാവിലെ മറ്റു വിദ്യാര്‍ത്ഥികള്‍ക്കൊപ്പം കളിക്കുന്നതിനിടെയാണ് ഫെബിന്‍ 45 അടി താഴ്ചയുള്ള കിണറ്റില്‍ വീഴുന്നത്.

വീഴ്ചയില്‍ തലയ്ക്ക് ഗുരുതരമായി പരുക്കേറ്റ ഫെബിന്‍ കൊല്ലത്തെ സ്വകാര്യ ആശുപത്രിയിലെ തീവ്ര പരിചരണ വിഭാഗത്തില്‍ ചികിത്സയിലായിരുന്നു. തലയോട്ടിക്ക് പൊട്ടല്‍ സംഭവിച്ചിട്ടുണ്ട്.

അപകടത്തിന് പിന്നാലെ വിദ്യാഭ്യാസ വകുപ്പ് ഉദ്യോഗസ്ഥര്‍ സ്‌കൂളില്‍ എത്തി പരിശോധന നടത്തിയിരുന്നു. കിണറിന് മുകളില്‍ മതിയായ സുരക്ഷ ഉണ്ടായിരുന്നില്ലെന്ന് വിദ്യാഭ്യാസ വകുപ്പ് അന്വേഷണത്തില്‍ കണ്ടെത്തി. പ്രാഥമിക അന്വേഷണം നടത്തിയ എ ഇ ഒ ,ഡി ഡി യ്ക്കും ഡി ഇ ഒ യ്ക്കും റിപ്പോര്‍ട് കൈമാറും. വിദ്യാഭ്യാസ വകുപ്പ് യാതൊരു പരിശോധന നടത്താതെ ഫിറ്റ്‌നസ് സര്‍ട്ടിഫിക്കറ്റ് നല്‍കുന്നു എന്ന് ആരോപിചിച്ചു കെഎസ്‌യു പ്രവര്‍ത്തകര്‍ ഡിഡിഇയെ ഉപരോധിച്ചു.തുരുമ്പിച്ച ഇരുമ്പ് നെറ്റും പ്ലാസ്റ്റിക് വലയുമാണ് കിണറിനു മുകളില്‍ സുരക്ഷയ്ക്കായി സ്ഥാപിച്ചിരുന്നതെന്ന് നാട്ടുകാര്‍ പറഞ്ഞു.