ചാത്തന്നൂര്‍: പരവൂര്‍ നഗരവും പരിസരപ്രദേശങ്ങളും ഇരുട്ടില്‍ തപ്പാന്‍ തുടങ്ങിയിട്ട് മാസങ്ങള്‍. അധികൃതര്‍ക്ക് അനക്കമൊന്നുമില്ല.
സന്ധ്യ കഴിഞ്ഞാല്‍ നഗരസഭാ പരിധിയിലെ റോഡുകളധികവും ഇരുട്ടിലാകും. ഒരിടത്തു പോലും തെരുവുവിളക്ക് കത്തുന്നില്ല. നഗരഹൃദയത്തില്‍ കോട്ടപ്പുറം ഹൈസ്‌കൂളിന് മുന്നിലെ റോഡ് പൂര്‍ണമായും ഇരുട്ടിലായിട്ട് നാളുകളേറെയായി. ഇത് പലപ്പോഴും അപകടങ്ങള്‍ക്കിടയാക്കുന്നുമുണ്ട്. പരവൂര്‍ ജങ്ഷനില്‍ ഹൈമാസ്റ്റ് ലെറ്റുണ്ടെങ്കിലും മിക്കപ്പോഴും ഒരു ലൈറ്റ് മാത്രമാണ് പ്രകാശിക്കാറുള്ളത്. ഇടറോഡികളിലെ സ്ഥിതിയും വ്യത്യസ്തമല്ല.
കുറുമണ്ടല്‍ കല്ലുംകുന്ന് പ്രദേശവാസികള്‍ ഈയിടെ വൈദ്യുതിപോസ്റ്റിന് ചുവട്ടില്‍ മണ്ണെണ്ണ വിളക്ക് കത്തിച്ച് പ്രതിഷേധിച്ചിരുന്നു. എന്നാല്‍ തെരുവുവിളക്കുകള്‍ സ്ഥാപിക്കാനും യഥാസമയം അറ്റകുറ്റപ്പണി നടത്താനും നഗരസഭ കൃത്യമായ നടപടികള്‍ സ്വീകരിക്കാറുണ്ടെന്നാണ് അധികൃതരുടെ വിശദീകരണം. കരാര്‍ എടുത്തിരിക്കുന്നവര്‍ ഇതില്‍ വീഴ്ച വരുത്തുകയാണത്രെ. ജോലിക്കാരെ കിട്ടാന്‍ ബുദ്ധിമുട്ടാണെന്നാണ് കരാറുകാരന്‍ മുന്നോട്ടുവെക്കുന്ന ന്യായം.