മുംബൈ: മഹാരാഷ്ട്രയില്‍ മന്ത്രിസഭാ രൂപീകരണ ചര്‍ച്ചകള്‍ അനിശ്ചിതത്വത്തില്‍. സര്‍ക്കാര്‍ രൂപീകരണത്തിനായി മുംബൈയില്‍ ചേരാനിരുന്ന മഹായുതി സഖ്യത്തിന്റെ യോഗം റദ്ദാക്കി. ഏക്‌നാഥ് ഷിന്‍ഡെ സത്താറയിലെ തന്റെ ഗ്രാമത്തിലേക്ക് പോയെന്നും അദ്ദേഹം തിരിച്ചെത്തിയതിനു ശേഷം യോഗങ്ങള്‍ നടക്കുമെന്നുമാണ് വിവരം. 

ബി.ജെ.പി. നേതാവ് ദേവേന്ദ്ര ഫഡ്‌നവിസ്, ശിവസേന അധ്യക്ഷന്‍ ഏക്‌നാഥ് ഷിന്‍ഡേ, എന്‍.സി.പി. അധ്യക്ഷന്‍ അജിത് പവാര്‍ എന്നിവര്‍ ഇന്നലെ വൈകിട്ട് ഡൽഹിയിൽ കേന്ദ്ര ആഭ്യന്തരമന്ത്രി അമിത് ഷായുമായി കൂടിക്കാഴ്ച നടത്തിയിരുന്നു. ഇതിനു പിന്നാലെയാണ് ഇന്ന് മുംബൈയിൽ യോഗം ചേരാനിരുന്നത്. 

അതേസമയം ഷിന്‍ഡെയുടെ പെട്ടെന്നുള്ള പദ്ധതി സര്‍ക്കാര്‍ രൂപീകരണ ചര്‍ച്ചകളില്‍ അദ്ദേഹം അസംതൃപ്തനാണെന്ന ഊഹാപോഹങ്ങള്‍ക്ക് കാരണമായിട്ടുണ്ട്.