തൊട്ടില്‍പ്പാലം: ആഴ്ചകള്‍ക്കുമുന്‍പ് പക്രതളം ചുരംറോഡിലെ മുളവെട്ടത്ത് അപകടത്തില്‍ തകര്‍ന്ന ലോറി നീക്കംചെയ്യാന്‍ ഇനിയും നടപടിയായില്ല. നിലവില്‍ ലോറിയുടെ വലിയൊരുഭാഗം റോഡിലേക്കായതിനാല്‍ ഇതിലൂടെ മറ്റുവാഹനങ്ങള്‍ക്ക് സുഗമമായി കടന്നുപോകാന്‍ കഴിയാത്ത സ്ഥിതിയാണ്. ഇതേതുടര്‍ന്ന് പരിചയക്കുറവുള്ള വാഹനങ്ങള്‍ മേഖലയില്‍ അപകടപ്പെടുന്നതും പതിവായിട്ടുണ്ടണ്ട്. കഴിഞ്ഞദിവസം രണ്ടണ്ടു ബൈക്ക് യാത്രികരാണ് അപകടത്തില്‍പെട്ടത്.
കഴിഞ്ഞ 19ന് പുലര്‍ച്ചെയായിരുന്നു കര്‍ണ്ണാടകയില്‍ നിന്നും കുരുമുളക് തൈകള്‍ കയറ്റി വരികയായിരുന്ന ലോറി ചുരം റോഡിലെ മുളവെട്ടത്ത് അപകടത്തില്‍പെട്ടത്. അപകടത്തില്‍ ലോറി ഡ്രൈവര്‍ കര്‍ണ്ണാടക ഹസ്സന്‍ ജില്ലയിലെ ആളൂര്‍ സ്വദേശി ചന്ദ്രശേഖര്‍ ഗുരുതരപരുക്കുകളോടെ കോഴിക്കോട് മെഡിക്കല്‍ കോളജ് ആശുപത്രിയില്‍ ചികിത്സയിലാണ്. സംഭവത്തില്‍ ലോറി ഭാഗികമായും തകര്‍ന്നിരുന്നു. അതേസമയം അപകത്തില്‍പെട്ട ലോറി കുത്തനെ ഇറക്കമിറങ്ങുന്ന ഭാഗത്തായതിനാല്‍ അപ്രതീക്ഷിതമായി വരുന്ന മറ്റു വാഹനങ്ങള്‍ക്ക് വലിയ ഭീഷണിയാണ് സൃഷ്ടിക്കുന്നത്. നീക്കം ചെയ്യാന്‍ വൈകുന്നത് വീണ്ടും അപകടം ക്ഷണിച്ചുവരുത്തലാണെന്ന് പ്രദേശവാസികള്‍ പറയുന്നു.
എന്നാല്‍ സംഭവം നടന്ന് ആഴ്ചകള്‍ കഴിഞ്ഞിട്ടും ചുരംഡിവിഷന്‍ അധികൃതര്‍ സംഭവസ്ഥലം സന്ദര്‍ശിക്കുകയോ ആവശ്യമായ സുരക്ഷാനടപടി സ്വീകരിക്കുകയോ ചെയ്യാത്തത് ശക്തമായ പ്രതിഷേധത്തിനിടയാക്കുന്നുണ്ട്.