മങ്കട: യുവാവിന് നടുറോഡില്‍ ആള്‍ക്കൂട്ട ആക്രമണം. മങ്കടക്ക് സമീപം വലമ്പൂരിലാണ് സംഭവം. ബൈക്ക് യാത്രികനായ യുവാവിനെ നടുറോഡില്‍ തടഞ്ഞുനിര്‍ത്തി ഇരുപതോളം പേര്‍ ചേര്‍ന്ന് വളഞ്ഞിട്ട് ആക്രമിക്കുകയായിരുന്നു. കരുവാരകുണ്ട് പുല്‍വെട്ട സ്വദേശി ഷംസുദ്ദീന്‍(40) ആണ് ആക്രമണത്തിനിരയായത്. 

ഞായറാഴ്ച വൈകീട്ട് അഞ്ചിനാണ് സംഭവം. പുലാമന്തോളില്‍ ഒരു മരണാനന്തരചടങ്ങില്‍ പങ്കെടുത്ത് നാട്ടിലേക്ക് മടങ്ങുകയായിരുന്നു ഷംസുദ്ദീന്‍. ഇതിനിടെ വലമ്പൂരില്‍വെച്ച് മുമ്പില്‍ പോയ ബൈക്ക് നടുറോഡില്‍ സഡന്‍ബ്രേക്കിട്ട് നിര്‍ത്തിയത് ഇദ്ദേഹം ചോദ്യം ചെയ്തു. ഇതിന്റെ പേരിലുണ്ടായ വാക്കേറ്റമാണ് ക്രൂരമര്‍ദ്ദനത്തില്‍ കലാശിച്ചത്.

വഴിയോരത്ത് ചോരയൊലിച്ച് കിടന്ന ശംസുദ്ദീനെ ഒന്നരമണിക്കൂറോളം ആരും തിരിഞ്ഞ് നോക്കിയില്ലെന്നും ആരോപണമുണ്ട്. ആശുപത്രിയില്‍ പോകാന്‍ അനുവദിച്ചില്ല. വെള്ളം ചോദിച്ചപ്പോള്‍ നാട്ടുകാരില്‍ ഒരാള്‍ കുപ്പിവെള്ളം നല്‍കി. എന്നാല്‍ അക്രമികള്‍ ഇത് പിടിച്ചുവാങ്ങി അതില്‍ തുപ്പിയിട്ട് കുടിക്കാന്‍ പറഞ്ഞു. ഒടുവില്‍ കരുവാരകുണ്ടില്‍നിന്ന് ബന്ധുക്കള്‍ എത്തിയാണ് ഇദ്ദേഹത്തെ ആശുപത്രിയില്‍ എത്തിച്ചത്. 

മുഖം വെട്ടിച്ചതിനാല്‍ കണ്ണിന് മുകളിലാണ് അടിയേറ്റത്. ഇവിടെ 10 തുന്നലുണ്ട്. കാഴ്ചക്ക് നേരിയ മങ്ങല്‍ അനുഭവപ്പെടുന്നുണ്ട്. ശംസുദ്ദീന്‍ പെരിന്തല്‍മണ്ണയിലെ ആശുപത്രിയില്‍ ചികിത്സയിലാണ്. സഹോദരന്‍ മുഹമ്മദലിയുടെ പരാതിയില്‍ മങ്കട പൊലിസ് കേസെടുത്തിട്ടുണ്ട്.

A man, identified as Shamsudeen (40), was brutally attacked by a group of around 20 individuals on a road in Valamboor, near Mankada.