ലണ്ടൻ: ഇംഗ്ലീഷ് പ്രീമിയർ ലീഗിൽ ആഴ്സണലിന്‌ ജയം. ഇപ്സ്വിച് ടൗണിനെ ഏകപക്ഷീയമായ ഒരു ഗോളിനാണ് ആഴ്‌സണൽ കീഴടക്കിയത്. മത്സരം വിജയിച്ചെങ്കിലും ആഴ്‌സണൽ ആരാധകർക്ക് നിരാശ നൽകുന്ന വാർത്തകളാണ് ഇപ്പോൾ പുറത്തുവന്നിരിക്കുന്നത്. പരിക്കേറ്റ ഇംഗ്ലണ്ട് സൂപ്പർതാരം ബുക്കയോ സാക്ക രണ്ട് മാസത്തോളം പുറത്തിരിക്കേണ്ടി വരുമെന്നാണ് റിപ്പോർട്ടുകൾ സൂചിപ്പിക്കുന്നത്. വലതു കാലിനു പരിക്കേറ്റ സാക്ക ശസ്ത്രക്രിയക്ക് വിധേയനാവുകയും മാർച്ച് മാസത്തോളം വരെ പുറത്തിരിക്കേണ്ടിവരും. 

നിലവിൽ ഈ സീസണിൽ ആഴ്സണലിന്റെ മുന്നേറ്റത്തിൽ ഗോളുകൾ കൊണ്ടും അസിസ്റ്റുകൾ കൊണ്ടും മിന്നി തിളങ്ങിയ താരമാണ് സാക്ക. അതുകൊണ്ട് തന്നെ സാക്കയുടെ അഭാവം നീണ്ട വർഷങ്ങൾക്ക് ശേഷം ഇംഗ്ലീഷ് പ്രീമിയർ ലീഗ് കിരീടം സ്വപ്നം കാണുന്ന ആഴ്സണലിന്‌ കനത്ത തിരിച്ചടിയായിരിക്കും നൽകുക.

മത്സരത്തിൽ ആഴ്സണലിനായി ജർമൻ താരം കൈ ഹാവേർട്സ് ആണ് ഗോൾ നേടിയിരുന്നത്. മത്സരത്തിൽ ആദ്യ പകുതിയിൽ ഇരുപത്തി മൂന്നാം മിനിറ്റിൽ ആയിരുന്നു സാക്ക ലക്ഷ്യം കണ്ടത്. വിജയത്തോടെ ഇംഗ്ലീഷ് പ്രീമിയർ ലീഗ് പോയിന്റ് പട്ടികയിൽ രണ്ടാം സ്ഥാനത്തെത്താനും ആഴ്സണലിന്‌ സാധിച്ചു. നിലവിൽ 18 മത്സരങ്ങളിൽ നിന്നും പത്തു വിജയവും ആറ് സമനിലയും രണ്ട് തോൽവിയും അടക്കം 36 പോയിന്റാണ് ആഴ്സണലിന്റെ കൈവശമുള്ളത്.