മസ്‌കത്ത്: ഒമാനിലെ വടക്കന്‍ ഗവര്‍ണറേറ്റുകളില്‍ ഇന്നലെ മഴ പെയ്തു. മുസന്ദം ഗവര്‍ണറേറ്റ്, തെക്കന്‍ ബത്തിന ഗവര്‍ണറേറ്റ്, മസ്‌കത്ത് ഗവര്‍ണറേറ്റിന്റെ തീരപ്രദേശങ്ങളില്‍ ഒറ്റപ്പെട്ട മഴ പെയ്തു. ചില ഉള്‍ഗ്രാമങ്ങളില്‍ നേരിയ തോതില്‍ മഴപെയ്തതിനാല്‍ ചില പാതകളില്‍ വെള്ളം കയറിയതായി റിപ്പോര്‍ട്ട് ചെയ്തു.

വടക്കന്‍ ഗവര്‍ണറേറ്റുകളില്‍ മേഘാവൃതമായ നില തുടരുന്നതിനാല്‍ അടുത്ത ദിവസം നേരിയ മഴയ്ക്ക് സാധ്യതയുണ്ടെന്ന് ജനറല്‍ ഡയറക്ടറേറ്റ് ഓഫ് മെറ്റീരിയോളജി അറിയിച്ചു. മഴയെ തുടര്‍ന്ന് വിവിധ പ്രദേശങ്ങളില്‍ താപനിലയില്‍ പ്രകടമായ മാറ്റം രേഖപ്പെടുത്തിയിട്ടുണ്ട്.

കാലാവസ്ഥാ വകുപ്പ് അറിയിച്ചതു പ്രകാരം ഞായറാഴ്ച വരെ തണുത്ത കാലാവസ്ഥ തുടരാനുള്ള സാധ്യതയുണ്ട്. ശക്തമായ മഴയും കാറ്റും അനുഭവപ്പെടുമെന്നും ശനിയാഴ്ച തണുപ്പ് ശക്തമാകുകയും ഞായറാഴ്ച കൂടുതല്‍ തീവ്രമാകുമെന്നും കാലാവസ്ഥാ മുന്നറിയിപ്പില്‍ പറയുന്നു.

പര്‍വത പ്രദേശങ്ങളില്‍ ശക്തമായ കാറ്റ് വീശാനും പൊടി ഉയരുന്നതിനാല്‍ ദൂരക്കാഴ്ചയെ ബാധിക്കാനുമുള്ള സാധ്യതയുണ്ട്. കടല്‍ പ്രക്ഷുബ്ധമായിരിക്കുമെന്നും സൂചനയുണ്ട്, അതിനാല്‍ ഈ പ്രദേശങ്ങളില്‍ ഉള്ളവര്‍ ജാഗ്രത പാലിക്കണമെന്ന് മുന്നറിയിപ്പ് നല്‍കിയിട്ടുണ്ട്.

ഉയര്‍ന്ന കാറ്റ്, പ്രക്ഷുബ്ധമായ കടല്‍, ദൃശ്യപരത കുറഞ്ഞ നില എന്നിവ മൂലമുണ്ടാകുന്ന അപകടസാധ്യതകളെ മറികടക്കാന്‍ ഈ പ്രദേശങ്ങളിലെ യാത്രക്കാര്‍ പ്രത്യേക ജാഗ്രത പാലിക്കണം.