ബെംഗളുരു: ബെംഗളരുവില്‍ ടെക്കി യുവാവും ഭാര്യയുമടങ്ങുന്ന നാലംഗ കുടുംബത്തെ മരിച്ച നിലയില്‍ കണ്ടെത്തി. യുവാവും ഭാര്യയും അവരുടെ അഞ്ച് വയസ്സുള്ള മകള്‍, രണ്ട് വയസ്സുള്ള മകന്‍ എന്നിവരുള്‍പ്പെടെ ഒരു കുടുംബത്തിലെ നാല് അംഗങ്ങളെയാണ് മരിച്ച നിലയില്‍ കണ്ടെത്തിയത്.

അനുപ് കുമാറും (38) ഭാര്യ രാഖിയും (35) എന്നിവരാണ് തൂങ്ങിമരിച്ചത്. ബെംഗളൂരുവിലെ ആര്‍എംവി രണ്ടാം സ്‌റ്റേജ് ഏരിയയിലെ വാടകവീട്ടില്‍ തൂങ്ങിമരിക്കുന്നതിന് മുമ്പ് ഇവര്‍ മക്കള്‍ക്ക് വിഷം നല്‍കി കൊലപ്പെടുത്തുകയായിരുന്നുവെന്ന് പൊലിസ് പറഞ്ഞു.

ഇവര്‍ ഉത്തര്‍പ്രദേശ് സ്വദേശികളാണെന്നാണ് പുറത്തുവരുന്ന വിവരം. അനൂപ് കഴിഞ്ഞ രണ്ട് വര്‍ഷമായി നഗരത്തിലെ ഒരു സ്വകാര്യ സ്ഥാപനത്തില്‍ സോഫ്റ്റ്‌വെയര്‍ കണ്‍സള്‍ട്ടന്റായി ജോലി ചെയ്തു വരികയായിരുന്നു.

തിങ്കളാഴ്ച രാവിലെ വീട്ടുജോലിക്കാരി എത്തിയപ്പോഴാണ് ഇവരെ മരിച്ച നിലയില്‍ കണ്ടെത്തിയത്. പലതവണ വാതിലില്‍ തട്ടിവിളിച്ചിട്ടും വീടിനുള്ളില്‍ നിന്ന് മറുപടി ലഭിക്കാത്തതിനെ തുടര്‍ന്ന് ആശങ്കയിലായ ജോലിക്കാരി അയല്‍വാസികളെ വിവരമറിയിക്കുകയും അവര്‍ പിന്നീട് പൊലിസിനെ ബന്ധപ്പെടുകയുമായിരുന്നു.

താമസസ്ഥലത്ത് പ്രവേശിച്ച അധികൃതര്‍ ദമ്പതികളുടെയും കുട്ടികളുടെയും ചേതനയറ്റ മൃതദേഹങ്ങളാണ് കണ്ടത്. കുടുംബത്തിന്റെ ആത്മഹത്യയുടെ കാരണം ഇതുവരെ കണ്ടെത്താനായിട്ടില്ല. അനുപ് കുമാറിന്റെ ബന്ധുക്കളെ വിവരം അറിയിച്ചതായി സെന്‍ട്രല്‍ ഡെപ്യൂട്ടി പോലീസ് കമ്മീഷണര്‍ ശേഖര്‍ എച്ച് തെക്കണ്ണവര്‍ പറഞ്ഞു. സംഭവത്തില്‍ കൂടുതല്‍ അന്വേഷണം നടന്നുവരികയാണ്.