വൈത്തിരി: താമരശ്ശേരി -വയനാട് ചുരത്തില്‍ ജീപ്പ് താഴ്ചയിലേക്ക് മറിഞ്ഞ് രണ്ടുപേര്‍ക്ക് പരുക്കേറ്റു. ഇന്ന് രാവിലെ ഒമ്പതരമണിക്കാണ് അപകടം. ജീപ്പിലുണ്ടായിരുന്ന കൈതപ്പൊയില്‍ സ്വദേശി ഇര്‍ഷാദ്, ഹാഫിസ് എന്നിവര്‍ക്കാണ് പരുക്കേറ്റത്. ഇവരെ ആശുപത്രിയിലേക്ക് കൊണ്ടുപോയി. 

ചുരത്തിലെ രണ്ടാം വളവില്‍നിന്ന് നിയന്ത്രണംവിട്ട ജീപ്പ് താഴ്ചയിലേക്ക് മറിയുകയായിരുന്നു. തലകീഴായി വീണ ജീപ്പിന്റെ മുകള്‍ഭാഗം പൂര്‍ണമായും തകര്‍ന്നു.നാട്ടുകാര്‍ ഉടന്‍തന്നെ അഗ്‌നിരക്ഷാസേനയെ വിവരം അറിയിച്ചു. അഗ്‌നിരക്ഷാസേനയും നാട്ടുകാരും ചേര്‍ന്നാണ് യുവാക്കളെ പുറത്തെത്തിച്ചത്.

അതേസമയം, പരുക്കേറ്റ ഒരാളുടെ പോക്കറ്റില്‍ നിന്നും എം.ഡി.എം.എ കണ്ടെത്തിയതായി പൊലിസ് അറിയിച്ചു. ഇതിന്റെ അടിസ്ഥാനത്തില്‍ ജീപ്പിനുള്ളില്‍ നടത്തിയ പരിശോധനയിലും എം.ഡി.എം.എ കണ്ടെടുത്തു. രണ്ട് പാക്കറ്റ് എം.ഡി.എം.എയാണ് കിട്ടിയത്. ഇവര്‍ താമസിച്ചിരുന്ന ഇടത്തും ജീപ്പ് മറിഞ്ഞ് വീണ സ്ഥലത്തും പൊലീസ് വിശദമായ പരിശോധന നടത്താനാണ് തീരുമാനം. വിദ്യാര്‍ഥികള്‍ക്ക് എവിടെനിന്നാണ് മയക്കുമരുന്ന് ലഭിച്ചതെന്നും വാഹനം ആരുടേതാണ് എന്നതുമടക്കമുള്ള കാര്യങ്ങളില്‍ പൊലിസ് അന്വേഷണം ആരംഭിച്ചിട്ടുണ്ട്. സംഭവവുമായി ബന്ധപ്പെട്ട് യുവാക്കളെ പൊലീസ് ചോദ്യം ചെയ്യും.