ഡൽഹി: ബിജെപിക്കെതിരായ ആം ആദ്‌മി പാർട്ടിയുടെ പരാതികൾ തെരഞ്ഞെടുപ്പ് കമ്മീഷൻ പരിശോധിക്കും. ഇതിനായി ഡൽഹിയിലെ മുഖ്യ തെരഞ്ഞെടുപ്പ് ഉദ്യോഗസ്ഥന് നിർദ്ദേശം നൽകി. അതേസമയം, ആം ആദ്‌മി പാർട്ടിയുടെ വാഗ്ദാനങ്ങൾ മറികടക്കാൻ വമ്പൻ പ്രഖ്യാപനത്തിനൊരുങ്ങുകയാണ് ബിജെപി. 

വോട്ടർ പട്ടികയിൽ ക്രമക്കേടുണ്ടെന്നും ന്യൂഡൽഹിയിലെ ബിജെപി സ്ഥാനാർഥി പർവേഷ് വർമ്മ വോട്ടിന് പണം നൽകി എന്നുമാണ് ആം ആദ്‌മി പാർട്ടി ആരോപിക്കുന്നത്. ഇക്കാര്യം ചൂണ്ടിക്കാട്ടി ആം ആദ്‌മി പാർട്ടി തെരഞ്ഞെടുപ്പ് കമ്മീഷന് പരാതി നൽകിയിരുന്നു. പരാതിയിൽ അന്വേഷണം നടത്തി നടപടിയെടുക്കാനാണ് തെരഞ്ഞെടുപ്പ് കമ്മീഷൻ ഡൽഹിയിലെ മുഖ്യ തെരഞ്ഞെടുപ്പ് ഉദ്യോഗസ്ഥന് നിർദ്ദേശം നൽകിയത്.

അതേസമയം, ആം ആദ്‌മി പാർട്ടിയുടെ സൗജന്യ വാഗ്ദാനങ്ങൾ മറികടക്കാൻ ബിജെപി ഉടൻ പദ്ധതികളും വാഗ്ദാനങ്ങളും പ്രഖ്യാപിക്കും. 300 യൂണിറ്റ് വരെ സൗജന്യ വൈദ്യുതി, സൗജന്യ പൈപ്പ് വെള്ളം, സ്ത്രീ വോട്ടർമാരെ ആകർഷിക്കാൻ ലാഡ്‌ലി ബെഹ്ന പോലുള്ള പദ്ധതികളാണ് ബിജെപി ആസൂത്രണം ചെയ്യുന്നത്. അതേസമയം, തൃണമൂൽ കോൺഗ്രസ്സും സമാജ്‌വാദി പാർട്ടിയും ഡൽഹിയിൽ ആംആദ്‌മിക്ക് പിന്തുണ നൽകിയത് ഇൻഡ്യ മുന്നണിയിൽ പൊട്ടിത്തെറിക്ക് കാരണമായി. ആം ആദ്‌മി പാർട്ടിക്കാണ് ഡൽഹിയിൽ കൂടുതൽ സാധ്യതയെന്ന സഖ്യ കക്ഷികളുടെ പ്രഖ്യാപനം കോൺഗ്രസിന് കടുത്ത അതൃപ്തിയാണ് ഉണ്ടാക്കിയിരിക്കുന്നത്.

The Election Commission will investigate complaints filed by the Aam Aadmi Party against the BJP.