കോഴിക്കോട്: മാമി തിരോധാനക്കേസില്‍ ചോദ്യം ചെയ്തതിന് പിന്നാലെ കാണാതായ ഡ്രൈവര്‍ രജിത് കുമാറിനെയും ഭാര്യയേയും ഗുരുവായൂരില്‍ നിന്ന് കണ്ടെത്തി.

ഗുരുവായൂരിലെ ലോഡ്ജില്‍ നിന്നാണ് ഇരുവരെയും പൊലിസ് കസ്റ്റഡിയിലെടുത്തത്. ഇരുവരെയും കണ്ടെത്താന്‍ പൊലിസ് ലുക്ക് ഔട്ട് നോട്ടീസ് പുറപ്പെടുവിച്ചിരുന്നു. 

അതേസമയം മനസമാധാനം ഇല്ലാത്തത് കൊണ്ടാണ് ഗുരുവായൂരിലേക്ക് പോയതെന്ന് രജിത് കുമാര്‍ പ്രതികരിച്ചു. പ്രതികളെക്കാള്‍ പീഡനമാണ് തനിക്കെന്നും, ചെയ്യാത്ത തെറ്റിനാണ് അനുഭവിക്കുന്നതെന്നും രജിത് പറഞ്ഞു.ഇരുവരുടെയും ഫോട്ടോ അടക്കമുള്ള നോട്ടീസാണ് പൊലിസ് പുറത്തിറക്കിയിരുന്നത്. കോഴിക്കോട് കെഎസ്ആര്‍ടിസി സ്റ്റാന്‍ഡ് പരിസരത്തുള്ള ഹോട്ടലിലാണ് ഇവര്‍ കഴിഞ്ഞിരുന്നത്. അവിടെ നിന്നും ഒരു ഓട്ടോറിക്ഷയില്‍ ഇരുവരും മടങ്ങുന്ന സിസിടിവി ദൃശ്യങ്ങള്‍ പൊലിസിന് ലഭിച്ചിരുന്നു. തുടര്‍ന്ന് നടത്തിയ അന്വേഷണത്തിലാണ് ഇവരെ കണ്ടെത്തിയത്.