മലപ്പുറം: പി.വി.അന്‍വര്‍ ഇന്ന് എംഎല്‍എ സ്ഥാനം രാജിവച്ചേക്കുമെന്ന് സൂചന. ഇന്ന് നടത്തുന്ന വാര്‍ത്താസമ്മേളനത്തില്‍ നിര്‍ണായക പ്രഖ്യാപനമുണ്ടാവുമെന്ന് അന്‍വര്‍ അറിയിച്ചിട്ടുണ്ട്. രാവിലെ ഒമ്പത് മണിക്ക് സ്പീക്കറെ കണ്ട ശേഷമായിരിക്കും വാര്‍ത്താ സമ്മേളനം.  തൃണമൂല്‍ കോണ്‍ഗ്രസില്‍ ചേരുമ്പോള്‍ അയോഗ്യത വരുന്നത് തടയാനാണ് രാജിവയ്ക്കാന്‍ അന്‍വര്‍ ആലോചിക്കുന്നത്.

രാജിക്കത്ത് കൈമാറാനാണ് സ്പീക്കറുമായുള്ള കൂടിക്കാഴ്ച എന്നാണ് സൂചന. 
സ്വതന്ത്ര എം.എല്‍.എ ഏതെങ്കിലും പാര്‍ട്ടിയില്‍ ചേര്‍ന്നാല്‍ അയോഗ്യനാക്കപ്പെടും. ഇത് മുന്നില്‍ കണ്ടാണ് എം.എല്‍.എ സ്ഥാനം രാജിവയ്ക്കാന്‍ ആലോചിക്കുന്നത്. 

മമതാ ബാനര്‍ജിയുമായുള്ള കൂടിക്കാഴ്ചയ്ക്ക് ശേഷമാണ് അന്‍വര്‍ തിരുവനന്തപുരത്ത് എത്തിയത്. രാജിവച്ച ശേഷം നിലമ്പൂരില്‍ വീണ്ടും മത്സരിക്കുമ്പോള്‍ അടി തെറ്റിയാല്‍ സംരക്ഷിക്കാമെന്ന ഉറപ്പ് മമത നല്‍കിയതായാണ് വിവരം. നാല് മാസത്തിന് ശേഷം ഒഴിവ് വരുന്ന രാജ്യസഭാ സീറ്റില്‍ അടക്കം പരിഗണിച്ചേക്കും. നാല് ദക്ഷിണേന്ത്യന്‍ സംസ്ഥാനങ്ങളുടെ ചുമതല ടി.എം.സി അന്‍വറിന് നല്‍കിയിട്ടുണ്ട്. എല്‍.ഡി.എഫ് പാളയത്തില്‍ നിന്ന് പിണങ്ങിയ ഇറങ്ങിയ അന്‍വറിന്റെ യു.ഡി.എഫ് പ്രവേശനം അദ്ദേഹം പ്രതീക്ഷിച്ചത് പോലെ സാധ്യമായില്ല. തുടര്‍ന്നാണ് തൃണമൂലില്‍ രാഷ്ട്രീയ അഭയം തേടാനുള്ള അന്‍വറിന്റെ തീരുമാനം.

P.V. Anwar is expected to resign from his MLA position today to avoid disqualification after joining the Trinamool Congress (TMC).