തിരുവനന്തപുരം: രണ്ടാം പിണറായി സർക്കാരിന്റെ നേട്ടങ്ങൾ എണ്ണിപ്പറഞ്ഞ് ഗവർണർ രാജേന്ദ്ര വിശ്വനാഥ് ആർലേക്കറുടെ നയപ്രഖ്യാപന പ്രസംഗം. സർക്കാർ നടപ്പാക്കാൻ പോകുന്ന പദ്ധതികളെക്കുറിച്ചും പ്രസംഗത്തിൽ സൂചിപ്പിച്ചു. കേരളം വ്യവസായ സൗഹൃദത്തിൽ ഒന്നാമതാണ്. ദേശീയപാത നിർമാണം സുഗമമായി മുന്നോട്ടുപോകുന്നു. സംസ്ഥാനത്തിന്റെ പൊതുവിതരണസംവിധാനം രാജ്യത്തെ തന്നെ മികച്ചതെന്നും ഗവർണർ പറഞ്ഞു. അടിസ്ഥാന സൗകര്യ വികസനത്തിന് സർക്കാർ മുൻഗണന നൽകുന്നുണ്ടെന്നും ജനങ്ങൾക്ക് നൽകിയ വാഗ്ദാനങ്ങൾ പാലിച്ചുവരുന്നുവെന്നും നയപ്രഖ്യാപനത്തിൽ പറയുന്നു. ദാരിദ്ര്യ നിർമാർജനത്തിനു മുൻഗണന നൽകുന്നുണ്ട്. 

എല്ലാവർക്കും പാർപ്പിടം ഉറപ്പാക്കാൻ നടപടി പുരോഗമിക്കുകയാണ്.  64,006 അതിദരിദ്രരെ കണ്ടെത്തി. ഇ വരുടെ പ്രശ്‌നം പരിഹരിക്കാൻ നടപടി തുടങ്ങി.ആരോഗ്യ വിദ്യാഭ്യാസ മേഖലയിൽ വൻ പുരോഗതിയാണ് കേരളം കൈവരിച്ചിട്ടുള്ളത്. വികസന നേട്ടങ്ങളിൽ സംസ്ഥാനം മാതൃകയാണ്. ഇന്റർനെറ്റ് സാർവത്രികമാക്കിയത് മുതൽ ഡിജിറ്റൽ സർവേ നടപടികൾ പൂർത്തിയാക്കിയതിൽ വരെ കേരളം നേട്ടത്തിന്റെ പാതയിലാണ്. ഉന്നത വിദ്യാഭ്യാസ മേഖലയിലെ കേരളത്തിന്റെ നേട്ടം എടുത്തുപറയേണ്ടതാണ്. കരിക്കുലം നവീകരണം ചരിത്രപരമായ നേട്ടമാണ്. നാലു വർഷ ബിരുദ കോഴ്‌സ് ഫലപ്രദമായി നടപ്പാക്കി. 

കാർഷികമേഖലയെ പരിസ്ഥിതി സൗഹൃദമായരീതിയിൽ പുനരുജ്ജീവിപ്പിക്കുന്നതിനുള്ള ബോധപൂർവമായ ശ്രമങ്ങളാണ് സർക്കാർ നടത്തിയിട്ടുള്ളത്. ത്വരിതഗതിയിലുള്ള സാമ്പത്തിക വളർച്ചയ്ക്കും പ്രത്യുൽപാദനപരമായ തൊഴിലവസരം സൃഷ്ടിക്കുന്നതിനും നടപടിയെടുത്തു. തരിശുരഹിത ഗ്രാമങ്ങൾ സൃഷ്ടിക്കുക എന്നതാണ് സർക്കാരിന്റെ പ്രഖ്യാപിത ലക്ഷ്യം. ഇതിനായി 'നവോഥാൻ' പദ്ധതി നടപ്പാക്കി.

കൂടുതൽ തരിശുഭൂമികൾ കൃഷിക്കായി ലഭ്യമാക്കുന്നതിലേക്കായി 'ക്രോപ് കൾട്ടിവേറ്റേഴ്‌സ് കാർഡ്' ആവിഷ്‌കരിക്കുമെന്നും നയപ്രഖ്യാപനം പറയുന്നു. കേരളത്തെ ആന്റിബയോട്ടിക് സാക്ഷരതയുള്ള സംസ്ഥാനമാക്കാൻ പരിശ്രമിക്കും. കെ ഡിസ്‌ക്കിന്റെ സഹകരണത്തോടെ ഡയബറ്റിക് റെറ്റിനോപ്പതി, ഇമ്മ്യൂണോ ചെയ്ൻ, ബ്ലഡ് ബാഗ് ട്രയിസബിലിറ്റി എന്നീ എ.ഐ, എം.എൽ അധിഷ്ഠിത ഉൽപന്നങ്ങൾ വികസിപ്പിച്ചിട്ടുണ്ടെന്നും നയപ്രഖ്യാപനം പറയുന്നു.

ന്യൂനപക്ഷ വിദ്യാർഥികൾക്ക് ഫെലോഷിപ്പ് ആരംഭിക്കും

തിരുവനന്തപുരം: ന്യൂനപക്ഷ വിഭാഗത്തിൽപ്പെട്ട ഗവേഷക വിദ്യാർഥികൾക്കായി ഫെലോഷിപ്പുകൾ ആരംഭിക്കുമെന്ന് ഗവർണർ നയപ്രഖ്യാപന പ്രസംഗത്തിൽ പറഞ്ഞു.  ക്ഷേമപരിപാടികളിലൂടെയും സമഗ്രവികസന സംരംഭങ്ങളിലൂടെയും ന്യൂനപക്ഷങ്ങളുടെ ഉന്നമനത്തിനായുള്ള പ്രതിബദ്ധതയിൽ സർക്കാർ നിലകൊള്ളും.

ന്യൂനപക്ഷ വിഭാഗത്തിൽപ്പെട്ട വിധവകൾ, വിവാഹമോചിതർ, ഉപേക്ഷിക്കപ്പെട്ട സ്ത്രീകൾ എന്നിവർക്കായുള്ള ഭവനപദ്ധതി, ഭവന നവീകരണം എന്നിവയിൽ ഗണ്യമായ പുരോഗതി കൈവരിച്ചിട്ടുണ്ട്. കരിയർ ഗൈഡൻസ് ക്യാംപുകളിലൂടെയും വിവാഹപൂർവ കൗൺസിലിങ് പോലുള്ള സംരംഭങ്ങളിലൂടെയും വിദ്യാഭ്യാസ ശാക്തീകരണത്തിന് മുൻഗണന നൽകിവരുന്നതായും നയപ്രഖ്യാപന പ്രസംഗത്തിൽ പറയുന്നു.