മുംബൈ: വരാനിരിക്കുന്ന ചാമ്പ്യൻസ് ട്രോഫി ടൂർണ്ണമെന്റിനുള്ള തയ്യാറെടുപ്പിലാണ് ഇന്ത്യൻ ക്രിക്കറ്റ് ടീം. ഇപ്പോൾ ടൂർണമെന്റിന് മുന്നോടിയായി ചാമ്പ്യൻസ് ട്രോഫി വിജയിക്കുന്നതിനെക്കുറിച്ച് സംസാരിക്കുകയാണ് ഇന്ത്യൻ നായകൻ രോഹിത് ശർമ്മ. 2024 ട്വന്റി ട്വന്റി ലോകകപ്പ് വിജയം മുംബൈ വാംഖഡെ സ്റ്റേഡിയത്തിൽ ആഘോഷിച്ചത് ചാമ്പ്യൻസ് ട്രോഫി കിരീടവും മുംബൈ സ്റ്റേഡിയത്തിൽ എത്തിക്കുമെന്നാണ് രോഹിത് പറഞ്ഞത്. വാങ്കഡെ സ്റ്റേഡിയത്തിൻ്റെ 50-ാം വാർഷികത്തിന്റെ ചടങ്ങിൽ സംസാരിക്കുകയായിരുന്നു രോഹിത്. 

'ഞങ്ങൾ ഇപ്പോൾ മറ്റൊരു ടൂർണമെൻ്റിന് തുടക്കമിടാൻ പോവുകയാണ്. ദുബായിൽ കളിക്കാനായി എത്തുമ്പോൾ 140 കോടി ജനങ്ങൾ ഞങ്ങളുടെ പിന്നിലുണ്ടാകുമെന്ന് എനിക്ക് ഉറപ്പുണ്ട്. അത് ഞങ്ങൾക്കറിയാം. ഈ ഐസിസി ചാമ്പ്യൻസ് ട്രോഫി തിരികെ ഇവിടെ വാംഖഡെയിൽ കൊണ്ടുവരാൻ ഞങ്ങൾ പരമാവധി ശ്രമിക്കും,' രോഹിത് പറഞ്ഞു.

ഫെബ്രുവരി 19 മുതൽ മാർച്ച് ഒമ്പത് വരെയാണ് ചാമ്പ്യൻസ് ട്രോഫി നടക്കുന്നത്. ചാമ്പ്യൻസ് ട്രോഫിയിൽ ഗ്രൂപ്പ് എയിൽ ആണ് ഇന്ത്യ ഉള്ളത്. ബംഗ്ലാദേശ്, പാകിസ്താൻ, ന്യൂസിലാൻഡ് എന്നീ ടീമുകളാണ് ഇന്ത്യക്കൊപ്പം ഗ്രൂപ്പിൽ ഉള്ളത്. ഫെബ്രുവരി 20ന് ബംഗ്ലാദേശിനെതിരെയാണ് ഇന്ത്യയുടെ ആദ്യ മത്സരം നടക്കുന്നത്.

ചാമ്പ്യൻസ് ട്രോഫിക്ക് മുമ്പേ ഇംഗ്ലണ്ടിനെതിരെയുള്ള പരമ്പരയാണ് ഇനി ഇന്ത്യയുടെ മുന്നിലുള്ളത്. ഇംഗ്ലണ്ടിനെതിരെ സ്വന്തം തട്ടകത്തിൽ അഞ്ചു ട്വന്റി ട്വന്റിയും മൂന്ന് ഏകദിനവും ആണ് ഇന്ത്യ കളിക്കുക. ജനുവരി 22 മുതൽ ഫെബ്രുവരി രണ്ട് വരെയാണ് ട്വന്റി ട്വന്റി പരമ്പര നടക്കുക. ഇതിനു ശേഷം ഫെബ്രുവരി ആറ് മുതൽ 12 വരെ മൂന്ന് ഏകദിന മത്സരങ്ങളും നടക്കും.