ദുബൈ: യു.എ.ഇയിലേക്കും തിരിച്ചും ഉള്‍പ്പെടെയുള്ള റൂട്ടുകളില്‍ സൗജന്യ ബാഗേജ് പരിധി 30 കിലോ ആക്കിയതായി പ്രഖ്യാപിച്ച് ഇന്ത്യയിലെ ഏറ്റവും വലിയ വിമാനക്കമ്പനിയായ എര്‍ ഇന്ത്യ (UAE-India flights: Airline increases free extra check-in baggage limit to 30kg). 30 കിലോ വരെ സൗജന്യ ബാഗേജ് കൊണ്ടുപോകാന്‍ കഴിയുന്നതിനൊപ്പം ഏഴു കിലോ വരെ തൂക്കം വരുന്ന കാബിന്‍ ബാഗേജും/ഹാന്‍ഡ് ബാഗും സൗജന്യമായി കൊണ്ടുപോകാം. യാത്രക്കാര്‍ക്കൊപ്പം ശിശുക്കള്‍ ഉണ്ടെങ്കില്‍ 10 കിലോഗ്രാമിന്റെ അധിക സൗജന്യ ചെക്ക്ഇന്‍ ബാഗേജ് അലവന്‍സും കമ്പനി വാഗ്ദാനം ചെയ്യുന്നു. ഇതോടെ ശിശുക്കളുമായി യാത്ര ചെയ്യുന്നവര്‍ക്ക് 47 കിലോ വരെ ഫ്രീയായി സാധനങ്ങള്‍ കൊണ്ടുവരാവുന്നതാണ്. യു.എ.ഇക്ക് പുറമെ പശ്ചിമേഷ്യയിലെ മറ്റ് ലക്ഷ്യസ്ഥാനങ്ങളിലേക്കും ഈ പാക്കേജുകള്‍ ലഭ്യമാണെന്നും എയര്‍ ഇന്ത്യ ഇന്നലെ അറിയിച്ചു.

സൗജന്യ ചെക്ക്ഇന്‍ ബാഗേജ് അലവന്‍സിന് പുറമേ ഏഴു കിലോയില്‍ കൂടാത്ത രണ്ട് ബാഗേജുകള്‍ വരെയുള്ള സൗജന്യ ക്യാബിന്‍ ബാഗേജ് അലവന്‍സും എയര്‍ലൈന്‍ വാഗ്ദാനം ചെയ്യുന്നു. യാത്രക്കാര്‍ക്ക് ഒരു ലാപ്‌ടോപ്പ് ബാഗ്, ഹാന്‍ഡ്ബാഗ്, ബാക്ക്പാക്ക് അല്ലെങ്കില്‍ മുന്നിലെ സീറ്റിനടിയില്‍ യോജിക്കുന്ന മറ്റേതെങ്കിലും ചെറിയ ബാഗ് എന്നിവയും കൊണ്ടുപോകാം. 

ചെറിയ കുഞ്ഞുങ്ങളുമായി യാത്ര ചെയ്യുന്ന കുടുംബങ്ങള്‍ക്കാണ് പുതിയ പരിഷ്‌കരണത്തിന്റെ ഏറ്റവും വലിയ പ്രയോജനം ലഭിക്കുക. പാല്‍ ഉള്‍പ്പെടെയുള്ള ഭക്ഷണവും ഡയപ്പറുകളും മറ്റ് ശിശുസംരക്ഷണത്തിനായുള്ള വസ്തുക്കളും കൈയില്‍ കരുതേണ്ടതിനാല്‍, ശിശുക്കളുമായി യാത്രചെയ്യുന്നവര്‍ക്ക് അധിക ആനുകൂല്യമില്ലാത്തത് യാത്രക്കാരെ വലിയ പ്രയാസത്തിലാക്കിയിരുന്നു. പുതിയ നിയമപ്രകാരം ഇവര്‍ക്ക് 10 കിലോഗ്രാമിന്റെ അധിക സൗജന്യ ചെക്ക്ഇന്‍ ബാഗേജ് അലവന്‍സ് ആണ് എയര്‍ ഇന്ത്യ വാഗ്ദാനം ചെയ്യുന്നത്. 

ലോകത്തിലെ ഏറ്റവും തിരക്കേറിയ വിമാന റൂട്ടുകളിലൊന്നാണ് യു.എ.ഇക്കും ഇന്ത്യക്കും ഇടയിലുള്ളത്. എല്ലാ വര്‍ഷവും ദശലക്ഷക്കണക്കിന് യാത്രക്കാരാണ് ഇരു രാജ്യങ്ങള്‍ക്കുമിടയില്‍ പറക്കുന്നത്. 

മുംബൈയിലെ ഛത്രപതി ശിവാജി മഹാരാജ് അന്താരാഷ്ട്ര വിമാനത്താവള (CSMIA) ത്തിന്റെ കണക്ക് പ്രകാരം ഇവിടെനിന്ന് ഏറ്റവും അധികം പറക്കുന്നത് ദുബൈയിലേക്കാണ്. മൂന്നാം സ്ഥാനത്ത് അബൂദബിയും. 

ടാറ്റ ഗ്രൂപ്പിന്റെ ഉടമസ്ഥതയിലുള്ള എയര്‍ ഇന്ത്യ, ഇന്ത്യയ്ക്കും മിഡില്‍ ഈസ്റ്റിനുമിടയില്‍ ആഴ്ചയില്‍ ഏകദേശം 450 സര്‍വീസുകള്‍ നടത്തുന്നു. മേഖലയിലെ 13 വിമാനത്താവളങ്ങളുമായി 19 ഇന്ത്യന്‍ നഗരങ്ങളെ കമ്പനി ബന്ധിപ്പിക്കുന്നു.

നേരത്തേ ഗള്‍ഫില്‍നിന്ന് നാട്ടിലേക്ക് പോകുന്നവര്‍ക്ക് 30 കിലോ ബാഗേജ് അനുവദിച്ചിരുന്നു. പക്ഷേ നാട്ടില്‍ നിന്ന് ഗള്‍ഫിലേക്ക് പോകുന്നവര്‍ക്ക് 20 കിലോ മാത്രമാണ് ബാഗേജ് അലവന്‍സുണ്ടായിരുന്നത്. പുതിയ മാറ്റം അനുസരിച്ച് ഇനി മുതല്‍ നാട്ടില്‍ നിന്ന് എല്ലാ ഗള്‍ഫ് രാജ്യങ്ങളിലേക്കും 30 കിലോ ബാഗേജ് അനുവദിക്കുമെന്നാണ് എയര്‍ ഇന്ത്യ അറിയിച്ചത്. ഇതിന് പുറമെയാണ് ഏഴുകിലോ കാബിന്‍ ബാഗേജും ശിശുക്കളുമായി യാത്രചെയ്യുന്നവര്‍ക്കുള്ള അധിക സൗജന്യവുംകമ്പനി പ്രഖ്യാപിച്ചത്.

ഗള്‍ഫ് മേഖലയില്‍ വിമാന കമ്പനികളുടെ മല്‍സരം മുറുകിയതോടെ പല എയര്‍ലൈനുകളും കൂടുതല്‍ ബാഗേജ് അനുവദിച്ചു തുടങ്ങിയിട്ടുണ്ട്.

Air India Express increased free check-in baggage to 30kg for passengers flying between the UAE, Middle East and other destinations. The carrier, which operates flights to different emirates of the UAE, also offers 7kg of cabin baggage.