വെസ്റ്റ്ബാങ്ക്: ഗസ്സയിലെ വെടിനിര്‍ത്തലിനു പിന്നാലെ ഹമാസിന്റെ ബദ്ധവൈരിയായ ഫലസ്തീന്‍ അതോരിറ്റി ഭരിക്കുന്ന വെസ്റ്റ്ബാങ്കില്‍ ആക്രമണം അഴിച്ചു വിട്ടിരിക്കുകയാണ് ഇസ്‌റാഈല്‍. ഇസ്‌റാഈല്‍ കഴിഞ്ഞ ദിവസങ്ങളില്‍ തുടര്‍ച്ചയായി നടത്തുന്ന ആക്രമണങ്ങള്‍ ജെനിന്‍ അഭയാര്‍ഥി ക്യാംപിനെ വാസയോഗ്യമല്ലതാക്കി മാറ്റിയെന്ന് യുനൈറ്റഡ് നാഷന്‍സ് റിപ്പോര്‍ട്ട് ചെയ്യുന്നു. പ്രദേശത്തെ പ്രധാന ആശുപത്രികളില്‍ വൈദ്യുതിയും വെള്ളവും വിച്ഛേദിച്ചതായും റിപ്പോര്‍ട്ടില്‍ വ്യക്തമാക്കുന്നു. 

കഴിഞ്ഞ ദിവസം 24 മണിക്കൂറിനുള്ളില്‍ 10 പേരെയാണ് ഇവിടെ ഇസ്‌റാഈല്‍ കൊലപ്പെടുത്തിയത്. ജെനിന്‍ അഭയാര്‍ഥി ക്യാംപിനു സമീപം നടത്തിയ ആക്രമണത്തില്‍ ആണ് ഇത്രയും പേര്‍ കൊല്ലപ്പെട്ടതെന്ന് ഫലസ്തീന്‍ ആരോഗ്യ മന്ത്രാലയം അറിയിച്ചു. അതിന് മുന്‍പുള്ള  ദിവസം റോഡരികിലെ ബോംബ് സ്‌ഫോടനത്തില്‍ ഇസ്‌റാഈല്‍ സൈനികന്‍ കൊല്ലപ്പെടുകയും മറ്റൊരു സൈനികന് ഗുരുതരമായി പരുക്കേല്‍ക്കുകയും ചെയ്തിരുന്നു. സൈനിക വാഹനം പോകുമ്പോഴാണ് സ്‌ഫോടനം നടന്നത്.

ഇസ്‌റാഈല്‍ സൈന്യവും പൊലിസുമാണ് ഇന്നലെ അതിരാവിലെ മുതല്‍ ആക്രമണം തുടങ്ങിയത്. കൊല്ലപ്പെട്ടവരുടെ പേരുവിവരങ്ങള്‍ ലഭ്യമല്ല. ആക്രമണത്തില്‍ 35 പേര്‍ക്ക് പരുക്കേറ്റു. സാധാരണക്കാര്‍ക്കും ഫലസ്തീന്‍ സുരക്ഷാ സേനയ്ക്കും എതിരേ ഇസ്‌റാഈല്‍ സൈന്യം നിറയൊഴിച്ചു. ആക്രമണം 'ഭീകരത' അമര്‍ച്ച ചെയ്യാനാണെന്നാണ് പതിവുപോലെ ഇസ്‌റാഈല്‍ പ്രധാനമന്ത്രി ബെന്യാമിന്‍ നെതന്യാഹു പ്രചികരിച്ചത്.  ഇസ്‌റാഈല്‍ നടത്തുന്നത് അധിനിവേശമാണെന്ന് ജനിന്‍ ഗവര്‍ണര്‍ കമാല്‍ അബഹു അല്‍ റബ് പറഞ്ഞു.