റിയാദ്: തൊഴിലാളി ക്ഷേമ നീക്കവുമായി സഊദി അറേബ്യ. ഗാര്‍ഹിക മേഖലയില്‍ ജോലി ചെയ്യുന്ന തൊഴിലാളികള്‍ക്ക് എല്ലാ ആഴ്ചയും ശമ്പളത്തോടു കൂടിയ അവധിക്ക് അര്‍ഹത ഉണ്ടായിരിക്കുമെന്ന് സഊദി തൊഴില്‍ വകുപ്പ് അധികൃതര്‍.

തൊഴിലാളികളുടെ സുഖ സൗകര്യങ്ങള്‍ ഉറപ്പാക്കുന്നതിനും തൊഴിലാളികള്‍ക്ക് അര്‍ഹമായ അവധി ലഭിക്കുന്നുണ്ടെന്നും ഉറപ്പാക്കാന്‍ ഇത്തരം നടപടിക്രമങ്ങള്‍ അനിവാര്യമാണെന്ന് രാജ്യത്തെ തൊഴില്‍ കാര്യങ്ങളുടെ ചുമതലയുള്ള, സര്‍ക്കാരിനു കീഴിലുള്ള മുസനേദ് പ്ലാറ്റ്‌ഫോം അധികൃതര്‍ വ്യക്തമാക്കി.

തൊഴിലുടമകളുടെയും തൊഴിലാളികളുടെയും അവകാശങ്ങള്‍ സംരക്ഷിക്കുന്നതിനും സന്തുലിതവും നീതിയുക്തവുമായ തൊഴില്‍ അന്തരീക്ഷം കൈവരിക്കുന്നതിനായി ഇരുകക്ഷികളും തമ്മിലുള്ള കരാറുംമായി ബന്ധപ്പെട്ടു നിലവിലുള്ള ചട്ടങ്ങള്‍ പ്രകാരം ആഴ്ചയില്‍ ഒരു ദിവസത്തെ അവധി നല്‍കും.

പരസ്പര ബഹുമാനത്തിലും അവകാശങ്ങളിലും അധിഷ്ഠിതമായ തൊഴില്‍ അന്തരീക്ഷം ഉറപ്പാക്കുന്നതിനും ഒരുക്കുന്നതിനും പ്രസക്തവും പ്രതിജ്ഞാബദ്ധവുമായ എല്ലാ നിര്‍ണായക ചട്ടങ്ങളും പാലിക്കണമെന്ന് മുസനെദ് എല്ലാ തൊഴിലുടമകളോടും അഭ്യര്‍ത്ഥിച്ചു.

അടുത്ത കാലത്തായി ഗാര്‍ഹിക തൊഴില്‍ മേഖലയില്‍ സഊദി സര്‍ക്കാര്‍ നിര്‍ണായക ഇടപെടലുകള്‍ നടത്തുന്നുണ്ട്. ഉപഭോക്താക്കള്‍ക്ക് അവരുടെ അവകാശങ്ങളെയും കടമകളേയുംകുറിച്ച് മനസ്സിലാക്കാനും വിസ വിതരണം, റിക്രൂട്ടമെന്റ് അഭ്യര്‍ത്ഥനകള്‍, തൊഴിലുടമയും തൊഴിലാളിയും തമ്മിലുള്ള കരാര്‍ എന്നിവയുള്‍പ്പെടെയുള്ള അനുബന്ധ സേവനങ്ങളെക്കുറിച്ച് മനസ്സിലാക്കാന്‍ സഹായിക്കുന്നതിനായി സഊദി മാനവവിഭവ ശേഷി വകുപ്പാണ് മുസനെദ് പ്ലാറ്റ്‌ഫോം സ്ഥാപിച്ചത്. കഴിഞ്ഞ വര്‍ഷം ഒക്ടോബറിലാണ് സഊദി മുസനെദ് ആപ്പ് അവതരിപ്പിച്ചത്.

2023ലാണ് സഊദി അറേബ്യ ഗാര്‍ഹിക തെഴിലാളികളെ നിയമിക്കുന്നതിനുള്ള ഏറ്റവും പുതിയ നിയമം കൊണ്ടുവന്നത്. ഇതു പ്രകാരം സഊദിയില്‍ ഗാര്‍ഹിക മേഖലയില്‍ തൊഴില്‍ എടുക്കാനുള്ള ഏറ്റവും കുറഞ്ഞ പ്രായം 21 ആണ്. തൊഴിലാളികള്‍ക്കോ അവരുടെ അവകാശികള്‍ക്കോ നല്‍കേണ്ട കുടിശ്ശികകള്‍ ഫസ്റ്റ്ഡിഗ്രി കടങ്ങളായി കണക്കാക്കുമെന്നാണ് സഊദിയിലെ നിയമങ്ങള്‍ പറയുന്നത്. കരാറുകള്‍ക്ക് ഒരു നിശ്ചിത കാലയളവ് ഉണ്ടായിരിക്കണം, അല്ലെങ്കില്‍ തൊഴിലാളി  തൊഴില്‍ ചെയ്യാനാരംഭിച്ച തീയതി മുതല്‍ ഒരു വര്‍ഷത്തേക്ക് അവ പുതുക്കാവുന്നതായി കണക്കാക്കും.

സഊദി അറേബ്യയിലെ ഗാര്‍ഹിക തൊഴിലാളികളില്‍ വീട്ടുജോലിക്കാര്‍, ഡ്രൈവര്‍മാര്‍, വീട്ടുജോലിക്കാര്‍, ക്ലീനര്‍മാര്‍, പാചകക്കാര്‍, ഗാര്‍ഡുകള്‍, കര്‍ഷകര്‍, ലിവ്ഇന്‍ നഴ്‌സുമാര്‍, ട്യൂട്ടര്‍മാര്‍, ആയമാര്‍ എന്നിവര്‍ ഉള്‍പ്പെടുന്നു.

Saudi with labor welfare movement; Henceforth one holiday with pay per week