കൊച്ചി: തൃക്കാക്കരയില്‍ എ.എസ്.ഐയ്ക്ക് നേരെ ഇതരസംസ്ഥാന തൊഴിലാളിയുടെ ആക്രമണം.  തൃക്കാക്കര എ.എസ്.ഐ. ഷിബിയ്ക്ക് നേരേയാണ് ആക്രമണമുണ്ടായത്. സംഭവത്തില്‍ പ്രതിയായ ഹിമാചല്‍പ്രദേശ് സ്വദേശി ധനഞ്ജയിനെ പൊലിസ് കസ്റ്റഡിയിലെടുത്തു. 

എ.എസ്.ഐയുടെ തലയില്‍ 7 തുന്നലുകളുണ്ട്. ഇന്‍ഫോ പാര്‍ക്കിനടുത്തുള്ള കെട്ടിടത്തില്‍ ഇതരസംസ്ഥാന തൊഴിലാളി മദ്യപിച്ച് അക്രമാസക്തനായെന്ന വിവരമറിഞ്ഞാണ് എ.എസ്.ഐ.യും  സംഘവും സംഭവസ്ഥലത്തെത്തിയത്. ഇയാള്‍ മദ്യപിച്ചു ബോധം കെട്ട അവസ്ഥയിലായതിനാല്‍ സ്ഥലത്തെത്തിയ പൊലീസ് ഇയാളെ അനുനയിപ്പിച്ച് പറഞ്ഞുവിട്ടു. 

എന്നാല്‍ രാത്രി 11 മണിയോടെ തൃക്കാക്കര പൊലീസ് സ്റ്റേഷന്‍ പരിധിയില്‍ വീണ്ടും ഇയാള്‍ പ്രശ്‌നമുണ്ടാക്കി. സ്ഥലത്തെത്തിയ ഷിബി കുര്യനും മറ്റു പൊലിസുകാരും ഇയാളെ പിടികൂടാന്‍ ശ്രമിച്ചെങ്കിലും അക്രമാസക്തനായ ആള്‍ പൊലിസുകാരുടെ യൂണിഫോം ഉള്‍പ്പെടെ വലിച്ചുകീറി. ഇതിനുപിന്നാലെയാണ് അക്രമി കല്ലുകൊണ്ട് എ.എസ്.ഐ.യുടെ തലയ്ക്കെറിഞ്ഞത്. ഇദ്ദേഹത്തെ ഉടന്‍ തന്നെ ആശുപത്രിയിലെത്തിച്ചു. 

ധനഞ്ജയനെ പിന്നീട് നാട്ടുകാരുടെ സഹായത്തോടെ കസ്റ്റഡിയിലെടുത്ത് സ്റ്റേഷനിലെത്തിച്ചു.