ഉമ്മുൽഖുവൈൻ: എമിറേറ്റിലെ റോഡുകളിൽ അശ്രദ്ധമായി വാഹനമോടിച്ചതിനും, അനുമതിയില്ലാതെ റേസിങ്ങും സ്റ്റണ്ടും നടത്തിയതിനും നിരവധി വാഹനങ്ങൾ പിടിച്ചെടുത്ത് ഉമ്മുൽഖുവൈൻ പൊലിസ്. പൊതു സുരക്ഷയെ അപകടകരമായി ബാധിക്കുന്ന തരത്തിലുള്ള പെരുമാറ്റങ്ങൾ തടയുന്നതിന്റെ ഭാ​ഗമായാണ് നടപടിയെന്ന് അധികൃതർ വ്യക്തമാക്കി. 

ഇത്തരത്തിലുള്ള പ്രവൃത്തികൾ മറ്റു ഡ്രൈവർമാരെയും യാത്രക്കാരെയും അപകടത്തിലാക്കുമെന്നതിനാൽ റോ‍‍ഡ് സുരക്ഷ ഉറപ്പാക്കുന്നതിനായി നിയമം ലംഘിക്കുന്നവർക്കെതിരെ നടപടികൾ ശക്തമാക്കുമെന്ന് ട്രാഫിക് ആൻഡ് പട്രോൾസ് വിഭാ​ഗം അധികൃതർ അറിയിച്ചു. അപകടങ്ങളും നിയമപരമായ പ്രത്യാഘാതങ്ങളും തടയുന്നതിന് വാഹനമോടിക്കുന്നവർ ഗതാഗത നിയമങ്ങളും ചട്ടങ്ങളും പാലിക്കണമെന്നും അധികൃതർ ആവശ്യപ്പെട്ടു. 

അനധികൃതമായി റോഡിലൂടെ മത്സരങ്ങളും സ്റ്റണ്ടുകളും നടത്തുന്നതിനെതിരെ കർശന നിയമ നടപടികൾ സ്വീകരിക്കുമെന്നും വാഹനം കണ്ടുകെട്ടുന്നത് കൂടാതെ കനത്ത പിഴകൾ ചുമത്തുമെന്നും അധികൃതർ അറിയിച്ചു. പൊതുജനങ്ങളെ റോ‍ഡ് സുരക്ഷയെപ്പറ്റി ബോധവാന്മാരാക്കുന്നതിനായി കാമ്പയിനുകൾ സംഘടിപ്പിക്കുന്നുണ്ട്. കൂടാതെ, പതിവ് പട്രോളിങ്ങുകൾ ശക്തിപ്പെടുത്തുമെന്നും ഉമ്മുൽഖുവൈൻ പൊലിസ് അറിയിച്ചു. ഏതെങ്കിലും ​ഗതാ​ഗത നിയമലംഘനങ്ങൾ ശ്രദ്ധയിൽപ്പെട്ടാൽ റിപ്പോർട്ട് ചെയ്യണമെന്നും അധികൃതർ പൊതു ജനങ്ങളോട് ആവശ്യപ്പെട്ടു.

Authorities in the UAE have seized numerous vehicles for violating traffic laws, emphasizing the country's commitment to road safety and strict enforcement of traffic regulations.