ന്യൂഡല്‍ഹി: രാജ്യത്തെ എന്‍ജിനീയറിങ് കോളജുകളിലേക്ക് ബിരുദ പ്രവേശനത്തിനായി നടത്തുന്ന ജെഇഇ മെയിന്‍ 2025 സെഷന്‍ 1 പരീക്ഷാഫലം പ്രഖ്യാപിച്ചു.

പരീക്ഷ എഴുതിയ 14 വിദ്യാര്‍ഥികള്‍ക്ക് നൂറില്‍ നൂറ് മാര്‍ക്കും ലഭിച്ചു. ഇതില്‍ കൂടുതല്‍ പേരും രാജസ്ഥാന്‍ സ്വദേശികളാണ്. നൂറ് മാര്‍ക്കും ലഭിച്ച 14 പേരില്‍ 12 വിദ്യാര്‍ഥികളും ജനറല്‍ കാറ്റഗറിയില്‍ ഉള്ളവരാണ്. ആയുഷ് സിംഗാള്‍, റൈത് ഗുപ്ത, സാക്ഷം ജിന്‍ഡാല്‍, അര്‍ണവ് സിംഗ്, എസ്.എം പ്രകാശ് ബെഹ്‌റ (രാജസ്ഥാന്‍), കുശാഗ്ര ഗുപ്ത (കര്‍ണാടക), ദക്ഷ്, ഹര്‍ഷ് ഝാ (ഡല്‍ഹി), ശ്രേയസ് ലോഹ്യ, സൗരവ് (ഉത്തര്‍പ്രദേശ്), വിശദ് ജെയിന്‍ (മഹാരാഷ്ട്ര), ശിവന്‍ വികാസ് തോഷ്‌നിവാള്‍ (ഗുജറാത്ത്), സായ് മനോഗ്‌ന ഗുത്തിക്കൊണ്ട (ആന്ധ്രാപ്രദേശ്), ബാനി ബ്രത മജീ (തെലങ്കാന) എന്നിവര്‍ക്കാണ് മുഴുവന്‍ മാര്‍ക്കും ലഭിച്ചത്. കഴിഞ്ഞമാസം 22, 23, 24, 28, 29 തീയതികളിലായി നടന്ന പരീക്ഷയ്ക്കായി 13 ലക്ഷം വിദ്യാര്‍ഥികളാണ് രജിസ്റ്റര്‍ ചെയ്തത്.

ഫലമറിയാന്‍

• എന്‍ടിഎയുടെ ഔദ്യോഗിക വെബ്‌സൈറ്റായ jeemain.nta.nic.inല്‍ വിദ്യാര്‍ഥികള്‍ക്ക് ആപ്ലിക്കേഷന്‍ നമ്പറും ജനനത്തീയതിയും നല്‍കി ഫലമറിയാം.
• വെബ്‌സൈറ്റില്‍ കയറി വ്യൂ സ്‌കോര്‍ കാര്‍ഡ് അല്ലെങ്കില്‍ വ്യൂ ജെഇഇ മെയിന്‍ 2025 റിസല്‍റ്റില്‍ ക്ലിക്ക് ചെയ്യണം.
• തുടര്‍ന്ന് ആപ്ലിക്കേഷന്‍ നമ്പറും പാസ് വേര്‍ഡും നല്‍കുന്നതോടെ ഫലം സ്‌ക്രീനില്‍ തെളിഞ്ഞുവരും.