മലപ്പുറം(പൂക്കോട്ടൂർ): 25ാമത് പൂക്കോട്ടൂർ ഹജ്ജ് ക്യാംപിന് ഖിലാഫത്ത് നഗരിയിൽ തുടക്കമായി. ഹജ്ജിന് പുറപ്പെടുന്നവർക്ക് മികച്ച പരിശീലനം നൽകുന്ന ക്യാംപിന്റെ ഉദ്ഘാടനം പാണക്കാട് സയ്യിദ് സാദിഖലി ശിഹാബ് തങ്ങൾ നിർവഹിച്ചു. 
ഹജ്ജ് ഏറ്റവും വലിയ ഐക്യത്തിന്റെ വേദിയാണെന്നും എല്ലാ അഭിപ്രായ വ്യത്യാസങ്ങളും മറന്ന് ഒരുമിച്ചിരിക്കുക എന്ന ആഹ്വാനം പ്രാവർത്തികമാക്കുകയാണ് ഹജ്ജിലൂടെ വിശ്വാസികൾ ചെയ്യുന്നതെന്നും തങ്ങൾ പറഞ്ഞു. 

ഒരേ സ്വരത്തിൽ ഒരേ വേഷത്തിൽ എല്ലാവരും ഒന്നാവുന്ന അത്മാവിന്റെ യാത്രയാണ് ഹജ്ജ്. ഒരു വിശ്വാസി സമുദായത്തിന്റെ പ്രതിനിധിയായിട്ടാണ് മക്കയിലെത്തുന്നത്. അതിനെ വെറും യാത്രയായി കണ്ടുകൂടാ. ഹജ്ജിലെ വിശുദ്ധിയും ഐക്യവും സാഹോദര്യവും ചേർന്നിരിപ്പുമെല്ലാം അതുകഴിഞ്ഞും കാത്തു സൂക്ഷിക്കാനാവണമെന്നും തങ്ങൾ ഓർമിപ്പിച്ചു. 
 ചടങ്ങിൽ പാണക്കാട് സയ്യിദ് അബ്ബാസലി ശിഹാബ് തങ്ങൾ അധ്യക്ഷനായി. അബ്ദുസമദ് പൂക്കോട്ടൂർ ക്ലാസിന് നേതൃത്വം നൽകി.

സൈനുൽ ആബിദ് സഫാരി മുഖ്യാതിഥിയായി. ഹജ്ജ് ക്യാംപിന്റെ വെബ്‌സൈറ്റ് അഡ്വ.ഹാരിസ് ബീരാൻ എം.പി ലോഞ്ച് ചെയ്തു. സുപ്രഭാതം സപ്ലിമെന്റ് സാദിഖലി ശിഹാബ് തങ്ങൾ കെ.എ റഹ്മാൻ ഫൈസിക്ക് നൽകി പ്രകാശനം ചെയ്തു. അബ്ദുസമദ് പൂക്കോട്ടൂർ രചിച്ച ഹജ്ജ് ഗൈഡ് കാടാമ്പുഴ മൂസഹാജി ത്വാഹ തിരുവനന്തപുരത്തിന് പ്രകാശനംൽകിയും പ്രകാശനം  നിർവഹിച്ചു. എം.എൽ.എമാരായ പി. ഉബൈദുല്ല, ടി.വി ഇബ്രാഹിം, സഊദി നാഷനൽ കെ.എം.സി.സി പ്രസിഡന്റ് കുഞ്ഞിമോൻ കാക്കിയ സംബന്ധിച്ചു. സമാപന ദിനമായ ഇന്ന് സമസ്ത പ്രസിഡന്റ് സയ്യിദ് മുഹമ്മദ് ജിഫ് രി മുത്തുക്കോയ തങ്ങൾ ഉദ്ഘാടനം ചെയ്യും. സമാപന പ്രാർഥനക്ക് കോഴിക്കോട് ഖാസി സയ്യിദ് മുഹമ്മദ് കോയ തങ്ങൾ ജമലുല്ലൈലി നേതൃത്വം നൽകും.