നമ്മള്‍ മലയാളികള്‍ക്ക് പ്രിയപ്പട്ടവയാണ് ചക്ക. ചക്ക പഴുത്തതും പച്ചയുമൊക്കെ നമ്മള്‍ ഉപയോഗിക്കും. കറിവച്ചും ഉപ്പേരി വച്ചും പഴുപ്പിച്ചും പൊരിച്ചും വറുത്തും അങ്ങനെ പലവിധത്തില്‍ ചക്കക്കാലമായാല്‍ നമ്മള്‍ ചക്ക കഴിക്കും. എന്നാല്‍ ഒരു തൈ എങ്കിലും വീട്ടില്‍ വയ്ക്കണം എന്ന് ആഗ്രഹമില്ലാത്തവര്‍ ഉണ്ടാവില്ല. 

പ്ലാവ് വച്ച് ആറാം മാസത്തില്‍ തന്നെ ചക്ക കിട്ടുന്ന പ്ലാവും ഉണ്ട്. നല്ലയിനം പ്ലാവ് വീട്ടില്‍ വയ്ക്കാനുദ്ദേശിക്കുന്നുണ്ടെങ്കില്‍ പരിചയമുളള നഴ്‌സറികളില്‍ നിന്നു തന്നെ നല്ല ഇനം പ്ലാവിന്‍ തൈ ചോദിച്ചു വാങ്ങുക. വാങ്ങുമ്പോള്‍ ഇലകളുടെ തിളക്കവും വേരുകളുടെ വളര്‍ച്ചയുമൊക്കെ ശ്രദ്ധിക്കുക. ഇതെല്ലാം നോക്കി ആയിരിക്കണം വാങ്ങേണ്ടത്. വിയറ്റ്‌നാം സൂപ്പര്‍ ഏര്‍ളിയാണ് വാങ്ങുന്നതെങ്കില്‍ സൂപ്പറായിരിക്കും. ഏതിനം ആണെങ്കിലും തൈ വാങ്ങുമ്പോള്‍ വിശ്വാസമുള്ളിടത്തു നിന്നു വാങ്ങുക. എന്നാലേ നല്ല കായ്ഫലമുണ്ടാവൂ. 

ഇതിനായി വട്ടത്തിലൊരു കുഴി അത്യാവശ്യം ആഴത്തില്‍ എടുക്കുക. ശേഷം അതില്‍ കരിയില കമ്പോസ്റ്റ് ഇട്ടു കൊടുക്കാം. അതിനുശേഷം പ്ലാവിന്‍ തൈയുടെ കവര്‍ പൊട്ടിക്കുക. എന്നിട്ട് മെല്ലെ അത് കുഴിയിലേക്ക് വച്ചു കൊടുക്കുക. ശേഷം കരിയില കുറച്ച് അതിലേക്ക് ഇട്ടു കൊടുക്കുക. 

കരിയില ഇട്ടാല്‍ മണ്ണിന് നല്ല ഇളക്കമുണ്ടാവുകയും തണുപ്പ് നിലനില്‍ക്കുകയും ചെയ്യുന്നതാണ്. മാത്രമല്ല, മണ്ണ് കട്ടപിടിക്കാതിരിക്കാനും ഇങ്ങനെ ചെയ്യുന്നതാണ്. പിന്നെ അര കിലോയോളം എല്ലു പൊടിയും അത്രതന്നെ ആട്ടിന്‍ കാഷ്ഠമോ ചാണകപ്പൊടിയോ ഇട്ടു കൊടുക്കണം. ഇതിനു ശേഷം മണ്ണിട്ടു കൊടുക്കുക. ചെറിയ തയ്യാണെങ്കില്‍ അതിനെ മുഴുവനായും മണ്ണിട്ട് മൂടരുത്. ബഡ് ഭാഗം പുറത്തേക്ക് കാണണം. 

ഈ രണ്ടു ഭാഗങ്ങള്‍ യോജിക്കുന്നിടത്ത് തൊലികള്‍ കൂടിയോജിപ്പിച്ച് അവിടെയും മണ്ണിട്ട് മൂടേണ്ടതാണ്. വേനല്‍ കാലത്താണ് കുഴി എടുത്ത് നടുന്നതെങ്കില്‍ കുഴി പൂര്‍ണമായും മൂടരുത്. മുകളിലെ കുറച്ചു ഭാഗം കുഴിയായി തന്നെ നിലനിര്‍ത്തുക. ഇതില്‍ വെള്ളം ഒഴിക്കുകയും തൈ വച്ച ശേഷം മണ്ണിടുകയും ചെയ്യുക.

ഇനി നന്നായി നനച്ചു കൊടുക്കണം. മാത്രമല്ല കാറ്റിലോ മറ്റോ ആടിയുലഞ്ഞ് വേരുകള്‍ക്കോ മറ്റോ ക്ഷതമേല്‍ക്കാതെ ഇരിക്കാന്‍ ഈ തൈ വച്ചിടത്ത് നല്ല ബലമുള്ള എന്തെങ്കിലും ഊന്നിവച്ച് കയര്‍ കൊണ്ട് അടുപ്പിച്ച് കെട്ടിവയ്ക്കുക. അതിനു ശേഷം ഇതിനു ചുറ്റും സംരക്ഷണം ഏര്‍പ്പെടുത്തണം. മറ്റു ജീവികളെന്തെങ്കിലും വരാതിരിക്കാനും നല്ലതാണ്. പ്ലാവിന്‍ തൈ വലുതാകുന്നതു വരെ മരത്തിന് താങ്ങായി ബലമുള്ള മരക്കഷണമോ മറ്റോ താങ്ങായി കൊടുക്കേണ്ടതുമാണ്. 

എല്ലാ ദിവസവും ഇതിനു വെള്ളം ഒഴിച്ചു കൊടുക്കണം. ആഴ്ചയില്‍ ഒരിക്കല്‍ ഇതിനു ചുറ്റും കരിയില ഇട്ടുകൊടുക്കുക. അങ്ങനെ വരുമ്പോള്‍ വെള്ളം വലിഞ്ഞു പോവുകയുമില്ല. തണുപ്പ് നീണ്ടു നില്‍ക്കുകയും ചെയ്യും. ഓരോ മാസവും 250 ഗ്രാം എല്ലുപൊടിയും ചാണകപ്പൊടിയും ഇടാവുന്നതാണ്. ആറുമാസം കഴിഞ്ഞാല്‍ പ്ലാവില്‍ ചക്ക ഉണ്ടാവുകയും ചെയ്യും.