ജയ്പൂർ: കഞ്ചാവ് കൈവശംവച്ച കേസിൽ ‘ഐഐടി ബാബ’ എന്നറിയപ്പെടുന്ന അഭയ് സിങ് അറസ്റ്റിൽ. നർക്കോട്ടിക് ഡ്രഗ്സ് ആൻഡ് സൈക്കോട്രോപിക് സബ്‌സ്റ്റാൻസസ് (NDPS) നിയമപ്രകാരം പൊലീസ് ഇയാളെ കസ്റ്റഡിയിൽ എടുത്തു. ജയ്പൂരിലെ റിദ്ധി സിദ്ധി മേഖലയിലെ ഒരു ഹോട്ടലിൽ താമസിക്കുമ്പോഴാണ് പൊലീസ് പരിശോധന നടത്തുകയും, അഭയ് സിംഗിന്‍റെ കൈവശം നിന്ന്  കഞ്ചാവ് പിടികൂടുകയും ചെയ്തത്.

തുടർന്നുള്ള ചോദ്യം ചെയ്യലിനിടെ, കഞ്ചാവ് പ്രസാദമായി ലഭിച്ചതാണെന്ന് അഭയ് സിങ് പൊലീസിനോടും പിന്നീട് മാധ്യമങ്ങളോടും പറഞ്ഞു. കേസിൽ ചെറിയ അളവിലുള്ള കഞ്ചാവായിരുന്നു ഉണ്ടായിരുന്നതെന്ന് കണക്കിലെടുത്ത്, പൊലീസ് പിന്നീട് അദ്ദേഹത്തെ വിട്ടയച്ചു.

36 ലക്ഷം രൂപ പ്രതിവാര ശമ്പളമുള്ള ജോലി ഉപേക്ഷിച്ച് സന്യാസ ജീവിതം തിരഞ്ഞെടുത്ത അഭയ് സിങ്, കുംഭമേളയിലുടെ പ്രചരിച്ച ഒരു ടെലിവിഷൻ ചാനലിന്റെ വീഡിയോയിലൂടെ വൈറലായിരുന്നു.

മുംബൈ ഐഐടിയിൽനിന്ന് എയറോസ്പേസ് എഞ്ചിനീയറിങ് ബിരുദം നേടിയ അഭയ് സിങ്, മൾട്ടിനാഷണൽ കമ്പനികളിൽ ജോലി ചെയ്ത ശേഷമാണ് ആത്മീയതയിലേക്ക് തിരിഞ്ഞത്. ഹരിയാനയിലെ ജാജ്‌ജർ ജില്ലയിലാണ് അദ്ദേഹത്തിന്റെ സ്വദേശം.