ബെയ്ജിങ്: സ്‌നേഹത്തിന്റെ തീവ്രത അളക്കാന്‍ കാമുകീ കാമുകന്‍മാര്‍ എന്തൊക്കെ ചെയ്യും. പൂക്കള്‍, റൊമാന്റിക് ഡിന്നര്‍. യാത്രകള്‍..സമ്മാനങ്ങള്‍ ഇതൊക്കെയാണ് സാധാരണയായി കാണാറ്. ആകാശത്തിലെ അമ്പിളിയെ പിടിക്കുന്നത് മുതല്‍ വലിയ ഉയരത്തില്‍ നിന്ന് ചാടുന്നത് വരെയുള്ള ചലഞ്ചുകള്‍ മുന്നോട്ടുവെക്കുന്നവരെ കഥകളിലും സിനിമകളിലുമൊക്കെ കണ്ടിട്ടുണ്ട്. എന്നാല്‍ ഇത് അതിനെല്ലാം മേലെ. ബാവിയില്‍ കാമുകി അനുഭവിക്കാനിരിക്കുന്ന പ്രസവവേദന അനുഭവിക്കാന്‍ തയ്യാറായി ഇവിടെ ഒരു കാമുകന്‍. ചൈനയിലെ ഹെനാന്‍ പ്രവിശ്യയിലാണ് ഈ അപൂര്‍വ്വ 'പ്രണയം'.

കാമുകിക്ക് വേണ്ടി അവര്‍ ഭാവിയില്‍ അനുഭവിക്കാന്‍ സാധ്യതയുള്ള പ്രസവവേദന വരെ അനുഭവിക്കാന്‍ തയ്യാറായിക്കളഞ്ഞു ഈ കാമുകന്‍. കാമുകന് തന്നോട് എത്രമാത്രം സ്‌നേഹമുണ്ടെന്നറിയാന്‍ ഒരു ചെറിയ പരീക്ഷണം നടത്തിതാണ് കക്ഷി. സ്ത്രീകള്‍ നേരിടുന്ന വെല്ലുവിളികള്‍ പുരുഷന്മാര്‍ അറിഞ്ഞിരിക്കണമെന്നും എങ്കിലേ ഭാര്യയെ  കാമുകന്‍ പരിചരിക്കുകയുള്ളുവെന്നും സഹോദരിയും അമ്മയും പറഞ്ഞതിന്റെ അടിസ്ഥാനത്തിലായിരുന്നു അവള്‍ അവനെ പരീക്ഷണത്തിന് വിധേയമാക്കിയത്. 

കൃത്രിമമായി പ്രസവവേദന അനുഭവിക്കാന്‍ കഴിയുന്ന ലേബര്‍ പെയിന്‍ സിമുലേഷന്‍ സെന്ററിലേക്ക് കാമുകി ആണ്‍സുഹൃത്തിനെ കൊണ്ടുപോവുകയായിരുന്നുവെന്ന് സൗത്ത് ചൈന മോര്‍ണിങ് പോസ്റ്റ് റിപ്പോര്‍ട്ടില്‍ പറയുന്നു. ചര്‍മ്മത്തിലൂടെയും പേശികളിലൂടെയും വൈദ്യുതി പ്രവാഹം കടത്തിവിട്ടാണ് പ്രസവ വേദന കൃത്രിമമായി അനുഭവപ്പെടുത്തുന്നത്. ഘട്ടം ഘട്ടമായി വേദനയുടെ അളവ് ഉയര്‍ത്തും. 

ഈ പരീക്ഷണത്തില്‍ യുവാവ് വിജയിച്ചു. വേദന അനുഭവിച്ചു. എന്നാല്‍ പണി പാളി. കാമുകന്റെ കുടലിന്റെ ഒരു ഭാഗം തന്നെ മുറിച്ചു മാറ്റേണ്ടി വന്നു. വേദന ഘട്ടംഘട്ടമായി ഉയര്‍ത്തുന്നതിനിടെ ലെവല്‍ പത്തായതോടെ തീവ്രമായ അടിവയറുവേദന ഇനുഭവപ്പെട്ടത്രേ യുവാവിന്. പിന്നീട് ഇയാള്‍ ഛര്‍ദ്ദിക്കാന്‍ തുടങ്ങിയെന്നും യുവതി പറയുന്നു.

ഒരു ആഴ്ച കഴിഞ്ഞതോടെ സ്ഥിതി കൂടുതല്‍ വഷളായി. ചെറുകുടലിന്റെ ഒരു ഭാഗം ചികിത്സിച്ച് ഭേദമാക്കാനാവാത്ത വിധം തകര്‍ന്നതായും ശസ്ത്രക്രിയ ആവശ്യമാണെന്നും ഡോക്ടര്‍മാര്‍ കണ്ടെത്തി. തോയാലും യുവാവിന്റെ ചെറുകുടലിന്റെ ഒരു ഭാഗം നീക്കം ചെയ്തതായാണ് റിപ്പോര്‍ട്ട്.

സംഭവം ചൈനയിലെ സമൂഹിക മാധ്യമങ്ങളിലുള്‍പ്പടെ വലിയ ചര്‍ച്ചയായി.  കാമുകനെ വേദനിപ്പിക്കാന്‍ താനും കുടുംബവും ഉദ്ദേശിച്ചിരുന്നില്ലെന്നാണ് ഭാവിവധു പറയുന്നത്. താന്‍ അനുഭവിക്കാന്‍ സാധ്യതയുള്ള കഠിനതകള്‍ മനസ്സിലാക്കിക്കുക എന്നത് മാത്രമായിരുന്നു ഉദ്ദേശിച്ചിരുന്നതും ഇവര്‍ വിശദീകരിക്കുന്നു. സംഭവിച്ചതിന്റെ പൂര്‍ണ്ണ ഉത്തവാദിത്വം ഏറ്റെടുക്കാന്‍ താന്‍ തയ്യാറാണെന്നും ഇവര്‍ വ്യക്തമാക്കുന്നു.