കണ്ണൂർ: കരിക്കോട്ടക്കരിയിൽ നിന്ന് മയക്കുവെടി വെച്ച് പിടികൂടിയ കുട്ടിയാന ചരിഞ്ഞു. ഇന്ന് രാത്രി ഒമ്പത് മണിയോടെയാണ് ആന ചരിഞ്ഞത്. ജനവാസ മേഖലയിൽ ഇറങ്ങിയ കുട്ടിയാനയെ വൈകിട്ട് വെറ്റിനറി ഡോക്ടർ അജീഷ് മോഹൻദാസിൻ്റെ നേതൃത്വത്തിൽ മയക്കുവെടി വെച്ച് പിടികൂടിയിരുന്നു.

ആനയുടെ താടിയെല്ലിന് ഗുരുതരമായി പരിക്കേറ്റിരുന്നു. പന്നിപ്പടക്കം കടിച്ചതിനാൽ മുറിവ് ഉണ്ടായെന്നാണു വനംവകുപ്പിന്റെ പ്രാഥമിക നിഗമനം. അന്നനാളം ഉൾപ്പെടെ ആനയ്ക്ക് ​ഗുരുതരമായ പരുക്കുകൾ ഉണ്ടായതിനെ തുടർന്ന് തീറ്റയും വെള്ളവും എടുക്കാൻ കഴിയാത്ത അവസ്ഥയിലായിരുന്നു. പടക്കം പൊട്ടിയ ആഘാതത്തിൽ പല്ലുകളും നാക്കും തകർന്നതായി റിപ്പോർട്ടുകൾ വ്യക്തമാക്കുന്നു.

സംഭവത്തിൽ കൊട്ടിയൂർ റേഞ്ചിൽ കേസ് രജിസ്റ്റർ ചെയ്തിട്ടുണ്ട്. പ്രത്യേക അന്വേഷണ സംഘം അന്വേഷണം ആരംഭിച്ചു. സിസിഎഫിന്റെ ഉത്തരവുപ്രകാരം കണ്ണൂർ ഡിഎഫ്ഒയുടെ നേതൃത്വത്തിലുള്ള 11 അംഗ സംഘമാണ് അന്വേഷണം നടത്തുന്നത്. രണ്ട് മാസത്തിനകം അന്തിമ റിപ്പോർട്ട് സമർപ്പിക്കണമെന്നാണ് നിർദേശം.