റിയാദ്: തന്റെ 40ാം വയസ്സിലും പ്രായത്തെ വെല്ലുന്ന പോരാട്ടവീര്യവുമായി ഫുട്ബോൾ ലോകത്തെ വിസ്മയിപ്പിക്കുകയാണ്  ഇതിഹാസതാരം ക്രിസ്റ്റ്യാനോ റൊണാൾഡോ. നിലവിൽ സഊദി വമ്പന്മാരായ അൽ നസറിന് വേണ്ടി റൊണാൾഡോ മിന്നും ഫോമിലാണ് കളിച്ചുകൊണ്ടിരിക്കുന്നത്. ഇപ്പോൾ തന്റെ  40ാം വയസ്സിലും ഫുട്ബോളിലെ മാർക്കറ്റ് വാല്യൂവിൽ മുന്നിലെത്തിയിരിക്കുകയാണ് റൊണാൾഡോ. 12 മില്യൺ യൂറോയാണ് റൊണാൾഡോയുടെ മാർക്കറ്റ് വാല്യൂ. ഫുട്ബോളിന്റെ ചരിത്രത്തിൽ 40 വയസ്സ് പിന്നിട്ട താരങ്ങളിൽ ഏറ്റവും കൂടുതൽ മാർക്കറ്റ് വാല്യൂവുള്ള താരമായും റൊണാൾഡോ മാറിയിരിക്കുകയാണ്. 2021ൽ സ്വീഡിഷ് ഇതിഹാസം സ്ലാറ്റൻ ഇബ്രാഹിമോവിച്ചിന് ലഭിച്ച 4 മില്യൺ യൂറോയേക്കാൾ വളരെ കൂടുതലാണ് റൊണാൾഡോക്ക് ലഭിച്ചിരിക്കുന്നത്. 

2023ലാണ് റൊണാൾഡോ സഊദി പ്രൊ ലീഗ് ക്ലബായ അൽ നസറിലെത്തുന്നത്. മാഞ്ചസ്റ്റർ യുണൈറ്റഡിൽ നിന്നും റെക്കോർഡ് തുകക്കാരാണ് റൊണാൾഡോ അൽ നസറലിയെത്തിയത്. റൊണാൾഡോയുടെ വരവോടെ സഊദി ലീഗിൽ ഒരുപാട് മാറ്റങ്ങളാണ് ഉണ്ടായിട്ടുള്ളത്. പോർച്ചുഗീസ് ഇതിഹാസത്തിന്റെ കടന്നുവരവോടെ സഊദി ഫുട്ബോളിന് ലോക ഫുട്ബോളിൽ കൃത്യമായ ഒരു മേൽവിലാസം സൃഷ്ടിച്ചെടുക്കാൻ സാധിച്ചിരുന്നു. സഊദി ക്ലബ്ബിനൊപ്പമുള്ള റൊണാൾഡോയുടെ കരാർ 2026ലാണ് അവസാനിക്കുന്നത്. അടുത്തിടെയാണ് റൊണാൾഡോ ടീമിനൊപ്പമുള്ള കരാർ പുതുക്കിയത്. 

 

ഇതിനോടകം തന്നെ വ്യത്യസ്ത ടീമുകൾക്ക് വേണ്ടി കളിച്ചുകൊണ്ട് റൊണാൾഡോ 926 ഗോളുകളാണ് അടിച്ചുകൂട്ടിയിട്ടുള്ളത്. അൽ നസറിന് വേണ്ടി റൊണാൾഡോ 90 ഗോളുകളാണ് ഇതുവരെ നേടിയിട്ടുള്ളത്. നിലവിൽ സഊദി പ്രൊ ലീഗിലെ ഈ സീസണിൽ ഗോൾ വേട്ടക്കാരുടെ പട്ടികയിൽ ഒന്നാമതുള്ളതും റൊണാൾഡോ തന്നെയാണ്. 2023-24 സീസണിൽ 45 മത്സരങ്ങളിൽ നിന്നും 44 ഗോളുകളും 13 അസിസ്റ്റുകളുമായിരുന്നു റൊണാൾഡോ നേടിയിരുന്നത്. ഇതിൽ സഊദി ലീഗിൽ 35 ഗോളുകളുമാണ് റൊണാൾഡോ അടിച്ചുകൂട്ടിയത്. സഊദി പ്രോ ലീഗിലെ കഴിഞ്ഞ സീസണിലെ ഗോൾഡൻ ബൂട്ട് സ്വന്തമാക്കിയതും റൊണാൾഡോ തന്നെയാണ്. 

നിലവിൽ സഊദി പ്രൊ ലീഗിൽ നാലാം സ്ഥാനത്താണ് അൽ നസർ. 24 മത്സരങ്ങളിൽ നിന്നും 14 വിജയവും ആറ് സമനിലയും നാല് തോൽവിയുമായി 48 പോയിന്റാണ് റൊണാൾഡോയുടെയും സംഘത്തിന്റെയും കൈവശമുള്ളത്. ലീഗിൽ ഒന്നാം സ്ഥാനത്തുള്ളത് അൽ ഇത്തിഹാദാണ്‌. 24 മത്സരങ്ങളിൽ നിന്നും 18 വിജയവും നാല് സമനിലയും രണ്ട് തോൽവിയുമായി 58 പോയിന്റാണ് അൽ ഇത്തിഹാദിനുള്ളത്. 54 പോയിന്റുമായി അൽ ഹിലാൽ രണ്ടാം സ്ഥാനത്തും 51 പോയിന്റോടെ അൽ ഖാദിസിയ എഫ്‌സി മൂന്നാം സ്ഥാനത്തുമാണ് ഉള്ളത്.