ന്യൂഡൽഹി: ഇൻസ്റ്റാഗ്രാമിൽ പരിചയപ്പെട്ടയാളെ കാണാനായി ഡൽഹിയിലെത്തിയ ബ്രിട്ടീഷ് യുവതിയെ മഹിപാൽപൂരിലെ ഹോട്ടലിൽ വെച്ച് ബലാത്സംഗം ചെയ്തതായി പരാതി. സംഭവത്തിൽ പ്രതികളായ കൈലാഷ്, ഹോട്ടൽ ജീവനക്കാരൻ വസീം എന്നിവർ പോലീസ് പിടിയിലായി.

ഇൻസ്റ്റ​ഗ്രാം വഴി പ്രതി കൈലാഷുമായി പരിചയത്തിലായ ബ്രിട്ടീഷ് യുവതി ഇന്ത്യയിൽ എത്തിയതിനെത്തുടർന്ന് മഹിപാൽപൂരിലെ ഹോട്ടലിൽ താമസം ഏർപ്പാടാക്കുകയായിരുന്നു. ചൊവ്വാഴ്ച രാത്രി, കൈലാഷ് ഹോട്ടലിൽ എത്തുകയും എന്നാൽ സുഹൃദാനുഭാവത്തിൽ തുടങ്ങിയത് ക്രൂരതയിലേക്കെത്തുകയുമായിരുന്നു. യുവതി  പ്രതിരോധിക്കാൻ ശ്രമിച്ചിട്ടും കൈലാഷ് ബലാത്സംഗം ചെയ്തതായാണ് പരാതി.

പീഡനശേഷം, സംരക്ഷണം തേടി റിസപ്ഷനിലെത്തിയപ്പോൾ ദുരന്തം അവിടെയും യുവതിയെ കൈവിട്ടില്ല. ഹോട്ടൽ ജീവനക്കാരനായ വസീം സഹായം വാഗ്ദാനം ചെയ്ത് യുവതിയെ ലിഫ്റ്റിലേക്ക് കൂട്ടിക്കൊണ്ടുപോയി. അവിടെ, വെറും നിമിഷങ്ങൾക്കുള്ളിൽ, യുവതിയെ വീണ്ടും പീഡിപ്പിക്കുകയായിരുന്നു.

സംഭവം ഉടൻ തന്നെ വസന്ത് കുഞ്ച് പോലീസ് സ്റ്റേഷനിൽ റിപ്പോർട്ട് ചെയ്യുകയും, യുവതിയുടെ മെഡിക്കൽ പരിശോധന നടത്തിയ ശേഷം കേസിൽ നിയമനടപടികൾ ആരംഭിക്കുകയും ചെയ്തു. ബ്രിട്ടീഷ് ഹൈക്കമ്മീഷനെ വിവരം അറിയിച്ച പോലീസ്, ഇരുപ്രതികളെയും അറസ്റ്റ് ചെയ്തു.

കൈലാഷ് ഒരു സ്വകാര്യ കമ്പനിയിൽ ജോലി ചെയ്യുന്നയാളാണ്.  ഇം​ഗ്ലീഷ് വശമില്ലാത്ത കൈലാഷ്  ആശയവിനിമയത്തിനായി ഗൂഗിൾ ട്രാൻസ്ലേറ്റ് ഉപയോഗിച്ചിരുന്നുവെന്ന് പോലീസ് കണ്ടെത്തി. പോലീസ് കേസ് വിശദമായി അന്വേഷിച്ചുവരികയാണ്.