റാസല്‍ഖൈമ: സുഹൃത്തിനെ മാരകമായി കൊലപ്പെടുത്തിയ കേസില്‍ റാസല്‍ഖൈമയില്‍ വധശിക്ഷയ്ക്ക് വിധിക്കപ്പെട്ട് എട്ട് വര്‍ഷമായി ജയിലില്‍ കഴിയുകയായിരുന്ന അറബ് പൗരന് ഇരയുടെ കുടുംബം മാപ്പ് നല്‍കി.

2016ലാണ് കേസിനാസപദമായ സംഭവം നടന്നത്. റാസല്‍ഖൈമ പീനല്‍ ആന്‍ഡ് കറക്ഷണല്‍ ഫെസിലിറ്റിയിലെ രേഖകള്‍ പ്രകാരം ആട്ടിടയന്റെ ജോലി ചെയ്തിരുന്ന ഒരു സുഹൃത്തിന്റെ സഹായത്തോടെയാണ് ഇയാള്‍ അബൂദബിയില്‍ നിന്ന് താമസം മാറിയത്. 

ഇരുവരും ഒരു മാസത്തോളം ഒരുമിച്ച് ജോലി ചെയ്തു. താമസിയാതെ സുഹൃത്ത് അറബ് പൗരനെ നിരന്തരം അപമാനിക്കാനും നിസ്സാരവല്‍ക്കരിക്കാനും തുടങ്ങി. ഇക്കാരണത്താല്‍ ഇവര്‍ തമ്മില്‍ നിരന്തരം തര്‍ക്കങ്ങള്‍ ഉണ്ടാവുകയും ചെയ്തിരുന്നു.

ഒരു ദിവസം ദേഷ്യം വന്ന അറബ് പൗരന്‍ സുഹൃത്തിനെ ചട്ടുകം കൊണ്ട് അടിച്ചു. തുടര്‍ന്ന് സൃഹുത്തിനെ ബലം പ്രയോഗിച്ച് കീടനാശിനി കുടിപ്പിച്ചു. ഇതിനുശേഷം ഇയാളും കൂടനാശിനി കഴിച്ച് ആത്മഹത്യ ചെയ്യാന്‍ ശ്രമിച്ചിരുന്നു. സംഭവസ്ഥലത്തുണ്ടായിരുന്ന ഒരു ഏഷ്യന്‍ തൊഴിലാളി സംഭവം അധികൃതരെ അറിയിക്കുകയായിരുന്നു. സംഭവ സ്ഥലത്തെത്തിയ പൊലിസ് അറബ് പൗരനെ ജീവനോടെയും സുഹൃത്തിനെ മരിച്ച നിലയിലും കണ്ടെത്തി.

പൊലിസ് ചോദ്യം ചെയ്യലില്‍ പ്രതി കുറ്റം സമ്മതിച്ചു. പ്രതികാരമായാണ് താന്‍ ഇയാളെ വധിച്ചതെന്നും പ്രതി  പറഞ്ഞു. തുടര്‍ന്ന് കോടതി പ്രതിയെ മുന്‍കൂട്ടി ആസൂത്രണം ചെയ്ത കൊലപാതക കുറ്റം ചുമത്തി വധശിക്ഷയ്ക്ക് വിധിക്കുകയായിരുന്നു.

പ്രതി എട്ട് വര്‍ഷം ജയില്‍ ശിക്ഷ അനുഭവിച്ചതിന് ശേഷം ഇരയുടെ കുടുംബം ദയാപ്പണത്തിന് പകരമായി കേസ് ഉപേക്ഷിക്കുകയായിരുന്നു. മോചിതനായ ശേഷം പ്രതിയെ അധികൃതര്‍ നാടുകടത്തി.

Man Sentenced to Death Spends 8 Years in Prison Before Victim’s Family Grants Pardon