ന്യൂഡല്‍ഹി: ശനിയാഴ്ച ഡല്‍ഹിയില്‍ വായു ഗുണനിലവാര സൂചിക (എ.ക്യു.ഐ) 85 ആയി രേഖപ്പെടുത്തി. ദേശീയ തലസ്ഥാനത്ത് മാര്‍ച്ച് മാസത്തില്‍ 'തൃപ്തികരമായ' എ.ക്യു.ഐ രേഖപ്പെടുത്തുന്നത് ഇത് ആദ്യമായാണ്. കൂടാതെ, ജനുവരി 1 മുതല്‍ മാര്‍ച്ച് 15 വരെയുള്ള കാലയളവില്‍ കഴിഞ്ഞ മൂന്ന് വര്‍ഷങ്ങളിലെ ഏറ്റവും കുറഞ്ഞ എ.ക്യു.ഐ ഇതാണ്. ഡല്‍ഹിയുടെ ചില ഭാഗങ്ങളില്‍ ഇളം മഴ പെയ്തതോടെ വേനല്‍ക്കാല ചൂട് കുറഞ്ഞത് ഈ അനുകൂലമായ എ.ക്യു.ഐ രേഖപ്പെടുത്തുന്നതിന് കാരണമായി.

കേന്ദ്ര മലിനീകരണ നിയന്ത്രണ ബോര്‍ഡിന്റെ കണക്കുകള്‍ പ്രകാരം, എ.ക്യു.ഐ (വായു ഗുണനിലവാര സൂചിക) പൂജ്യം മുതല്‍ 50 വരെ 'നല്ലത്', 51 മുതല്‍ 100 വരെ 'തൃപ്തികരം', 101 മുതല്‍ 200 വരെ 'മിതം', 201 മുതല്‍ 300 വരെ 'മോശം', 301 മുതല്‍ 400 വരെ 'വളരെ മോശം', 401 മുതല്‍ 500 വരെ 'ഗുരുതരം' എന്നിങ്ങനെ തരം തിരിച്ചിരിക്കുന്നു. മലിനീകരണ നിയന്ത്രണ ബോര്‍ഡ് ശനിയാഴ്ച വൈകീട്ട് രേഖപ്പെടുത്തിയ എ.ക്യു.ഐ 80 ആയിരുന്നു, ആ ദിവസത്തെ ഏറ്റവും കുറഞ്ഞ നിരക്കാണ് ഇത്്.

ശനിയാഴ്ച ഡല്‍ഹിയിലെ കുറഞ്ഞ താപനില 19 ഡിഗ്രി സെല്‍ഷ്യസും കൂടിയ താപനില 33 ഡിഗ്രി സെല്‍ഷ്യസും ആയിരുന്നു. കാലാവസ്ഥാ നിരീക്ഷണ കേന്ദ്രം ഇടിമിന്നലും മഴയും ഉണ്ടാകുമെന്ന് പ്രവചിച്ചിരുന്നു. നാളെ (മാര്‍ച്ച് 16)  ്രമേഘാവൃതമായ കാലാവസ്ഥക്കും നേരിയ മഴക്കും സാധ്യതയുണ്ടെന്ന് സൂചിപ്പിക്കുന്നു. നാളത്തെ കുറഞ്ഞ താപനില 17 ഡിഗ്രി സെല്‍ഷ്യസും പരമാവധി താപനില 32 ഡിഗ്രി സെല്‍ഷ്യസ് വരെ എത്താനും സാധ്യതയുണ്ട്.

Delhi's air quality has shown significant improvement, reaching its best level in three years, marking a positive shift in the city's environmental conditions.