താമരശ്ശേരി: 58 ഗ്രാം എംഡിഎംഎയുമായി താമരശ്ശേരിയില്‍ യുവാവ് പിടിയില്‍. അമ്പായത്തോട് സ്വദേശി മിര്‍ഷാദ് എന്ന മസ്താനെയാണ് പൊലിസ് പിടിയിലായത്. ഇയാള്‍ താമരശ്ശേരിയിലെയും പരിസര പ്രദേശങ്ങളിലെയും രാസലഹരി വില്‍പ്പനക്കാരില്‍ പ്രധാനിയാണെന്ന് പൊലിസ് പറഞ്ഞു. കോവൂര്‍ ഇരിങ്ങാടന്‍പള്ളിക്കു സമീപം നടത്തിയ പൊലിസ് പരിശോധനയിലാണ് യുവാവ് പിടിയിലായത്. 

പൊലിസില്‍ നിന്നും രക്ഷപ്പെടാനായി ശ്രമിക്കുന്നതിനിടെ എംഡിഎംഎ വിഴുങ്ങി മരിച്ച ഷാനിദിന്റെ സുഹൃത്താണ് മിര്‍ഷാദ്. ലഹരിക്കടിമപ്പെട്ട് ഭാര്യയെ കൊന്ന യാസിറുമായും ഉമ്മയെ കൊന്ന ആഷിഖുമായും പ്രതിക്കു ബന്ധമുണ്ടെന്നാണ് പൊലിസ് ഭാഷ്യം. 

കിലോക്കണക്കിനു  ലഹരിയെത്തിച്ച് താമരശ്ശേരിയിലും പരിസരപ്രദേശങ്ങളിലും വിതരണം ചെയ്യുന്ന വ്യക്തിയാണ് ഇയാള്‍ എന്നാണ് എക്‌സൈസ് ഉദ്യോഗസ്ഥര്‍ പറയുന്നത്. താമരശ്ശേരിയിലും പരിസര പ്രദേശങ്ങളിലും ലഹരി സംബന്ധിച്ച കേസുകള്‍ വര്‍ധിച്ച സാഹചര്യത്തില്‍ വന്‍പരിശോധനയാണ് നടത്തുന്നത്.