ന്യൂഡല്‍ഹി: ഡല്‍ഹി ജാമിഅ സര്‍വകലാശാലയില്‍ നടന്ന സംഘര്‍ഷത്തില്‍ പങ്കുണ്ടെന്നാരോപിച്ച് വിദ്യാര്‍ഥിയെ അറസ്റ്റ് ചെയ്തു. ഹസ്‌റത്ത് മുക്കറബീന്‍ എന്ന വിദ്യാര്‍ഥിയാണ് അറസ്റ്റിലായത്. ദീപാവലി ആഘോഷത്തിനിടയില്‍ കാംപസില്‍ നടന്ന സംഘര്‍ഷവുമായി ബന്ധപ്പെട്ടായിരുന്നു അറസ്റ്റ് ചെയ്തത്. ഫലസ്തീന്‍ സിന്ദാബാദ് എന്നും അല്ലാഹുഅക്ബര്‍ എന്നും മുദ്രാവാക്യങ്ങള്‍ വിളിച്ചെന്നാണ് എഫ്‌ഐആറില്‍ പറയുന്നത്. കഴിഞ്ഞദിവസം മുകറബിനെ പൊലിസ് അറസ്റ്റ് ചെയ്തിരുന്നു.

കഴിഞ്ഞ വര്‍ഷം ഒക്ടോബര്‍ മാസം 22 ന് നടന്ന ദീപാവലി ആഘോഷത്തില്‍ വിദ്യാര്‍ഥികള്‍ തമ്മില്‍ സംഘര്‍ഷമുണ്ടായിരുന്നു. എബിവിപിയുടെ നേതൃത്വത്തിലുള്‍പ്പെടെയാണ് ജാമിഅ മില്ലിയയില്‍ ദീപാവലി ആഘോഷം സംഘടിപ്പിച്ചത്. ആഘോഷത്തില്‍ ജയ് ശ്രീറാം ഉള്‍പ്പെടെയുള്ള മുദ്രാവാക്യങ്ങളും വിളിച്ചിരുന്നു.

ഇത് ചില വിദ്യാര്‍ഥികള്‍ ചോദ്യംചെയ്തതിനെ തുടര്‍ന്നുണ്ടായ തര്‍ക്കം സംഘര്‍ഷത്തില്‍ കലാശിക്കുകയായിരുന്നു. ഇതുമായി ബന്ധപ്പെട്ടാണ് ഡല്‍ഹി പൊലിസ് എഫ്‌ഐആര്‍ രജിസ്റ്റര്‍ ചെയ്തിരിക്കുന്നതും വിദ്യാര്‍ഥിയെ അറസ്റ്റ് ചെയ്തിരിക്കുന്നതും. വിദ്യാര്‍ഥിയെ ജുഡീഷ്യല്‍ കസ്റ്റഡിയില്‍ വിട്ടിട്ടുണ്ട്. സംഭവത്തില്‍ 25ല്‍ കൂടുതല്‍ വിദ്യാര്‍ഥികള്‍ക്കെതിരേ എഫ്‌ഐആര്‍ രജിസ്റ്റര്‍ ചെയ്തു.